Жаңа антология жарық көрді
Жуырда Атырау облыстық мәдениет, мұрағаттар және құжаттама басқармасы тапсырмасымен, Облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығы қолдауымен «Атырау өлкесінің әндері мен күйлері (ХХ ғ. композиторларының шығармашылығы) ғылыми жобасы бойынша екітомдық әндер мен күйлер Антологиясы жарық көрді.
Бұл жоба Қазақстан Республикасының Елбасы Н.Ә.Назарбаевтың «Ұлы даланың жеті қыры» еңбегінде көтерген бастамасымен «Рухани жаңғыру» мемлекеттік бағдарламасының аясында жүзеге асырылған еді.
Антологияға ХХ ғасырда өмір сүріп, туған өлкенің музыка мәдениетінің өркендеуіне өз шығармашылығымен үлес қосқан әуесқой композиторлардың таңдаулы ән-күйлері еніп отыр. Бұл көпшілікке танымал, халықтың жүрегінен орын алып, жадында сақталған туындылардың шығу тарихы мен авторлары туралы мәліметтер алғаш рет жүйелі жиналып, талданып ұсынылды. Кітап білім алушылар мен ізденушілерге, кәсіби музыканттарға және жалпы өнерсүйерлерге арналады.
Ірі ғылыми-зерттеу жобасына жетекшілік еткен Х.Досмұхамедов атындағы Атырау университетінің оқытушысы, өнертану кандидаты Б.Ж.Тұрмағамбетова. Бұл топта ОХШО мамандары Жантілекова Ә.Н., Әділова А.С. (құрастырушылар) және «Музыка және өнер» кафедрасының оқытушылары ҚР Мәдениет қайраткері Кипиев Қ.М., ҚР білім беру ісінің үздігі Гайсина М.З. қатысты.
Сонымен бірге университеттің Музыкалық білім мамандығының 3-курс студенттері Б.Ғазымова, А.Кітапқали, Ә.Нығметов қатысты.
1-томға Құрманғазы атындағы Қазақ ұлттық консерваториясының доценті, PhD докторы, музыкатанушы А.Р.Бердібай, 2-томға – Қазақстанның еңбек сіңірген қайраткері, композитор, профессор А.Т.Жайымов пікір жазды.
ПІКІРЛЕР