Ректор

Ректор



 
           "Я мечтать люблю, но не так – помечтал и все, а в том смысле, что мечтаешь, значит, хочешь, чтобы было именно так. Но очень важно прилагать усилия, чтобы мечты воплотились. У меня, как правило, мечты сбываются.
           А еще очень нравится древнегреческая пословица: «Великие цели рождают великие дела». Стараюсь и сотрудников учить целеполаганию и добиваться целей"

 

- Абзал Ахатұлы Талтенов









1972 жылы 11 қаңтарда  Атырау  облысы, Махамбет ауданы, Чкалово ауылында қызметкерлер отбасында дүниеге келді. 1979 ж. Индер ауданы, Елтай селосында В.И. Ленин атындағы орта мектепке барып, 1989 ж. аудан орталығындағы М. Әуезов атындағы орта мектепті күміс медальмен бітірді. Сол жылы Әл-Фараби атындағы Қазақ мемлекеттік университетінің химия факультетіне түсіп,  1994 жылы үздік аяқтап, Әл-Фараби атындағы ҚазМУ-дің аспирантурасына қабылданды. 1997 ж. химия ғылымдарының кандидаты атағына ие болып, 2007 жылы химия ғылымдары саласында докторлық диссертациясын қорғады.

Білім беру саласының үздігі Абзал Талтеновтың жоғары деңгейлі топ-менеджер ретінде қалыптасуы оның 1998-2001 жылдардағы Қазақстан Республикасының Білім және ғылым министрлігі Білім комитеті республикалық «Дарын» ғылыми-практикалық орталығында бас маман, директордың орынбасары қызметтерін атқарған кезінен басталады.

Абзал Ахатұлы 2001-2008 жж. С.Торайғыров атындағы Павлодар мемлекеттік университетінде қызметкерлер мен істер басқармасының бастығы, Әкімшілік департаментінің директоры, ғылыми жұмыстар және халықаралық байланыстар жөніндегі проректоры, бірінші проректоры қызметтерін атқарды.

Еліміздің шығыс өңіріндегі Семей мемлекеттік педагогикалық институтында 2008-2011 жылдар аралығында бірінші проректор-оқу ісі жөніндегі проректоры болса, 2011-2016 жылдары Қазақстанның көшбасшы оқу  орны саналатын Л.Н. Гумилев атындағы Еуразия ұлттық университетінің аппарат жетекшісі, оқу ісі жөніндегі проректор, ғылыми-зерттеу жұмыстары бойынша проректор қызметтерінде нәтижелі жұмыс көрсетті.

2016 жылдың 19 сәуірінде Қазақстан Республикасы Білім және ғылым министрінің бұйрығымен Х.Досмұхамедов атындағы Атырау мемлекеттік университетінің ректоры м.а. болып тағайындалды.

Елімізде жоғары оқу орындарының ректорларын тағайындау бойынша ең алғаш рет құрылған 2016 жылғы қарашадағы И.Тасмағамбетовтың төрағалық етуімен өткен республикалық конкурстық комиссияда Атырау университетін дамыту стратегиясын ұсынып, кеңестің шешімімен Х.Досмұхамедов атындағы Атырау мемлекеттік университетінің ректоры болып бекітілді.

Абзал Талтенов жоғары білім беру мен ғылым саласының заман талабына сай дамуына қатысты қайраткерлік қызметін жалғастырып, дарынды және бастамашыл ғалым ретінде өзін танытты.

Ғалым Абзал Талтеновтың «Университет – білім беру, ғылым, мәдениет орталығы» ұстанымы -  жоғары оқу орнының барлық бағыттағы, әсіресе ғылыми және инновациялық іс-әрекетіндегі белсенді жаңаруынан көрінеді.

А.Талтенов химия ғылымы саласындағы танымал ғалым, 80-нен астам ғылыми-әдістемелік жарияланымдардың, соның ішінде 3 монографияның, 8 авторлық куәліктің авторы. Ғылыми зерттеулерінің негізгі бағыты – мұнай химиясы, экология, катализ, химиялық кинетика.

Қазақстан Республикасының Ұлттық Жаратылыстану ғылымдары Академиясының академигі, Қазақстан Республикасы Педагогика ғылымдары Академиясының академигі, Халықаралық педагогикалық білім Академиясының мүше-корреспонденті. Химия және экология саласынан бірқатар ғылыми журналдардың редакциялық алқасының мүшесі. «Х.Досмұхамедов атындағы Атырау мемлекеттік университетінің хабаршысы» ғылыми журналының бас редакторы.

Қазақстан Республикасының Президенті Н.Ә.Назарбаевтың «Алғыс хаты» (2004 ж.), «Қазақстан Республикасы Білім саласының Құрметті қызметкері» белгісімен (2005 ж.), Қазақстан Республикасы ғылымына сіңірген еңбегі үшін» белгісімен (2009 ж.), С.Торайғыров атындағы «Алтын медальмен» (2010 ж.), «Қазақстан Республикасы Тәуелсіздігінің 20 жылдығы», «Қазақстан Конституциясына 20 жыл» мерекелік медалдарымен марапатталды.

Жаңашылдыққа жаны жақын Абзал Талтенов басшылыққа келген аздаған айлардың ішінде-ақ университетте Қазақстан бойынша алғашқы және бірегей жобалар қарқынды жүзеге асуда.

2016 жылғы қарашада облыс көлемінде алғаш рет ағылшын тілі және STEM фестивалі ұйымдастырылды. STEM – «Science, Technology, Engineering and Math» салаларында білім беруді көздейді.

2017 жылдың 31 қаңтарында университет базасында Халықаралық жастар қоры, «Шеврон» компаниясы мен Атырау облысы әкімдігімен бірлесе отырып, «Заңғар» жобасы аясында «Fab Lab Atyrau» цифрлық өндіріс зертханасы ашылып, жұмыс жасауда.

«Қазақстан - 2050» Стратегиясында көрсетілген «Білім және кәсіби дағды – заманауи білім беру жүйесінің, мамандар дайындаудың және қайта даярлаудың негізгі бағдарлары» бағыты негізінде А.Талтенов оқу орнында университеттің экологиялық саналы дамуын қамтамасыз ететін «Эко-кампус», педагогикалық мамандықтардың студенттеріне облыстық және қалалық мектептер негізінде практикалық дағдыларды үйрену мүмкіндігін беретін «Педагогика мектебі», студенттер арасында кәсіпкерлік мәдениет дамытуға арналған «iSpace» бизнес-инкубатор, инновациялық жоба және ағылшын тілін тегін үйрену мүмкіндігі бар «English only Space» және практикалық тәсілдерге негізделген белсенді және шығармашылық оқуға ықпал ететін бірегей білім кеңістігі – «Lego-студия» робот жасау техникасы кешенді зертханасы жобаларын қолға алды.

А.Талтеновтың алға қойып отырған басты мақсаты – Атырауды батыс Қазақстанда ғана емес, бүкіл Каспиймаңы мега-аймағындағы инновациялық білім орталығына айналдыру.

Ағартушы Абзал Талтеновтың маңызды ғылыми-ағартушылық жұмысы Атырау өңірінің тарихи-мәдени және әдеби, ғылыми мұраларын сақтау мен насихаттау, әсіресе өскелең ұрпаққа танытумен байланысты. Осы бағытта Махамбет, Мұрат Мөңкеұлы және басқа да қазақ халқының даңқты ұлдарының кесенелеріне тарихи-танымдық саяхаттар ұйымдастырды. Облысымыздың аудандарында жастармен және аудан тұрғындарымен білім, ғылым, мәдениет күндерінде кездесті.

Қоғамдық жұмысында «Нұр Отан» партиясының белсенді мүшесі ретінде бірнеше рет Н.Ә.Назарбаевтың Қазақстан Республикасы Президенті кандидаттығына қатысты құрылған «Нұр Отан» партиясы Атырау облыстық филиалы саяси кеңесінің бюро мүшесі, қуниверситеттің «Нұр Отан» партиясы «Бірлік» бастауыш партия ұйымының төрағасы. Атырау облыстық Ішкі істер басқармасы жанындағы қоғамдық кеңес мүшесі.

Отбасылық өмірінде Абзал Талтенов спорт және салауатты өмір салтын қалыптастыру жұмыстарына үлкен көңіл бөледі. Волейбол және баскетбол ойындарын шебер ойнайды.

Жұбайы Клара Дүйсенбайқызымен отбасында 2 қыз, 1 ұл тәрбиелеп отыр.