Біздің университет

Біздің университет

Халел Досмұхамедов атындағы Атырау мемлекеттік университеті

            Қазіргі әлемде білім мен ғылым қоғам дамуына жаңа белеске көтерер қуатты күшке айналып отыр. Қазақстан білім мен ғылым жүйесінде инновациялық даму болашағын таңдады. Бұл бағытта Қазақстанның жоғарғы оқу орындарына айрықша мән беріледі. Университеттік білім беру негізіне ғылыми зерттеу жүйесі басты тірек болып саналады. Осы арқылы аймақтық университет өңірдің әлеуметтік-экономикалық даму орталығына айналып, алдыңғы қатарлы ғылыми ой-пікірге тартылуда.

            Х.Досмұхамедов атындағы Атырау мемлекеттік университеті өзінің 65-жылдан астам тарихында Батыс Қазақстан аймағындағы ірі білім және ғылым орталығына айналды.

Х.Досмұхамедов атындағы Атырау мемлекеттік университеті – Қазақстан Республикасының білім беру жүйесінде өзіндік тарихы мен тәжірибесі бар халықаралық деңгейдегі бәсекеге қабілетті мамандар даярлайтын жоғарғы оқу орны.

            Университет 1950 жылы 14 маусымда мұғалімдер институты ретінде ашылды. Алғашқы оқу жылында институтта 3 бөлім ашылып, қазақ және орыс тілдерінде оқитын 150 студент қабылданды.

            1955 жылы мұғалімдер институты педагогикалық институтқа  айналды. 1994 жылы педагогика институты Атырау университеті болып құрылды. Осы жылы көрнекті қайраткер, ғұлама ғалым Халел Досмұхамедовтың есімі берілді. Жоғарғы оқу орны мемлекеттік аттестаттаудан өтіп, Қазақстанның Батыс аймағында алғашқы аймақтық университет дәрежесіне ие болды.

            2005 жылы оқу орнының білім берудегі бәсекеге қабілеттілігімен және әлемдік білім беру саласындағы талаптарды қамтамасыз етуге бағытталған Сапа менеджменті жүйесі енгізілді. Оқу орны «Moody International Certification» ұйымының «ИСО 9001-2000» және «Эксперттеу және сертификаттау ұлттық орталығы» АҚ-ның Батыс Қазақстандық филиалының сертификатына ие болды.

            2007 жылы Университет ғалымдары Қазақстан Республикасы Президентінің «Сапа саласындағы жеткен жетістіктері үшін» сыйлығының жеңімпаздарын анықтау мақсатында болған «Алтын сапа» көрме байқауына қатысып, Алғыс хатқа ие болды.

            2009 жылдың18 қыркүйегінде (Болонья) университеттер Ұлы Хартиясына қол қойды,   бұның өзі – университеттің қабілеттілігі мен мол дәстүрінің белгісі.

            2010 жылы университет Ұлы Хартиясына біріккен 600 әлемдік университеттер қатарына енді. Университет Болон процесінің толық қатысушысы болып есептелді. Болон үдерісі талаптарына сәйкес білім алушылардың қос диплом алуларына, оқу орнына қысқа мерзімде бітіруге мүмкіндігі бар. Қазақстанның үздік жоғарғы оқу орындарының рейтінгісінің қорытындысы бойынша университет көп салалы университеттердің ішінде алтыншы орынға ие.

            Университет саясаты – сапалы білім беру, халықаралық деңгейге шығару, дайындаған мамандардың бәсекеге қабілеттілігін қамтамасыз ету.

            Оқу орны 46 мамандық бойынша бакалаврлар және 14 мамандық бойынша магистрлер даярлауды жүзеге асырады. Университетте 500-ге жуық оқытушы- профессорлар бар, олардың 200-і ғылым докторлары мен ғылым кандидаттары, профессорлар мен доценттер, PhD докторлары.

            Университетте электронды оқулықтар даярлау зертханасы, ақпараттық технологиялар орталығы, баспахана, оқу-телерадио орталығы, электрондық оқу залы, интернет-клуб, заманауи техникалық құралдармен жабдықталған оқу зертханалары мен компьютерлік сыныптар жастарға сапалы білім беру ісінде тиімді пайдаланылады.

            Түлектерді жұмысқа орналасу деңгейін арттыру және білікті мамандарға тапсырыстарды қанағаттандыру үшін жыл сайын жұмысқа орналасу жәрмеңкесі өтеді, оған аймақтағы отандық және шет елдік компаниялар, түрлі деңгейдегі банк өкілдері, облыстық білім беру департаментінің жауапты адамдары қатысады. Оқу үдерісінде танымал тұлғалардың шеберлік сыныптары дәстүрлі өткізіледі. «Дипломмен - ауылға» мемлекеттік бағдарламасы тиімді жұмыс жасайды.

            Университет келешегі - білім беру мен кәсіби мамандар дайындаудың сапасын халықаралық стандарттар деңгейінде қамтамасыз ететін, ұлттық инновациялық даму міндеттерін шешуге белсене қатысатын Қазақстанның батысындағы жетекші оқу орны.

            Университет аймақтың әлеуметтік-экономикалық және қоғамдық-саяси дамуына өзіндік үлесін қоса отырып, инновациялық білім беру жүйесіне әлемдік стандартқа сәйкес келетін жоғарғы білікті мамандар даярлайды.

Университет – Каспий маңы елдері мемлекеттік университеттері Ассоциациясының, дүниежүзілік классикалық университеттер Ұлы Хартиясының (Болонья 2010), Қазақстан Республикасы жоғарғы оқу орындары Ассоциациясының мүшесі.

            Университеттің шетелдік жоғарғы оқу орындарымен және ғылыми орталықтарымен іскерлік ынтымақтастығы орнады.

            Студенттердің жан-жақты дамуына университетте барлық жағдай жасалған. Біз - Қазақстанның болашағын дайындап отырғанымызға толық сенімдіміз!