01.07.2022 592

Шілде айының алғашқы күні Х.Досмұхамедов атындағы Атырау университетінде 28 маусым – БАҚ қызметкерлері мерекесіне орай өңірдегі университетпен бірге тығыз қарым-қатынаста жұмыс атқарып жүрген ақпарат саласы өкілдеріне арнайылап дайындалған салтанатты шара өтті. Қоғамдағы журналистиканың дамуына, оның заман ағымына сай өзгешеліктеріне тоқталған жиынға Атырау БАҚ өкілдері мен облыстық және қалалық баспасөз хатшылары, университеттің журналистика кафедрасының меңгерушісі және басқарма төрағасы-ректор Саламат Нұрмұханұлы қатысты. Жиын барысында облыс әкімінің баспасөз хатшысы Әсел Тұмашқызы «Университет қабырғасында білім беріп қана емес, облыстық телеарналарда және Атырау-Ақпарат ЖШС базасында тәжірибе алмасуға көптеп көңіл бөлінуі керек деп ойлаймын. Соған орай мен білім алушылармен бірге әкімдік жанындағы басқарма және департаменттерде тренингтер жүргізсек деген ойымды білдіремін. Сондай-ақ, тамыз айында өтетін тегін тренингтерге университет баспасөз қызметінде бірге тәжірибе алмасуға шақырамын» деген ұсынысын жеткізді. Дөңгелек үстел барысында өңірдегі ақпарат қызметінің шешімін күткен мәселелері де аталып өтті. Осы тұста, «Атырау-Ақпарат» ЖШС директоры Жасын Біркенов дәстүрлі баспасөзден бөлек, электронды ақпарат құралдарын дамыту бойынша да білім ордасымен байланысып жұмыс атқарылу керек екенін айтып, smm маманына сұрастың көп екенін және де біліктілікті арттыратын курстардың қажеттілігін, сыни материалдардың көптеп берілуін тілге тиек етті. Сонымен қатар, университетіміздегі ректор аппаратының жетекшісі Гүлфайруз Қайырғалиқызы медиорталықтың жұмыс барысымен таныстырып, журналистика кафедрасының меңгерушісі Мәншүк Тынышқалиқызы кафедраның жеткен жетістігі мен оқуда озат болып, БАҚ саласында белсенділік танытқан студенттердің жеңісін көрсетті. Бүгінде БАҚ - мемлекет пен қоғам, билік пен халықтың арасын жалғайтын басты құрал. Ұлттың ұлылығын асқақтататын, рухын көтеретін де солар. Еңселі еліміздің ертеңі мен бүгіні үшін қызмет етіп жатқан барлық БАҚ өкілдерін тағы да кәсіби мерекелерімен құттықтаймыз!

Тізімге қайта оралу