10.05.2024 202

Биыл Халықаралық шәкіртақыны Х.Досмұхамедов атындағы Атырау университетінің 5 студенті алды. Шәкіртақыны Әзербайжан Республикасының Қазақстандағы Бас консулдығының басшысы Эльчин Маммадов табыстады. Әзербайжанның ұлт көшбасшысы, мемлекет қайраткері Гейдар Алиев атындағы халықаралық шәкіртақысы Х.Досмұхамедов университетінің студенттеріне дәстүрлі түрде 14 жыл қатарынан беріліп келеді. Бұл іс-шара бауырлас екі мемлекеттің мәдени-рухани және білім беру саласындағы байланыстарын тереңдетіп, ынтымақтастықты нығайтуды көздейді. «Бүгін Ұлт көшбасшысы, Әзербайжан Республикасының тұңғыш Президенті Гейдар Алиевтың туған күні. Осыған орай, Халел Досмұхамедов университетінің үздік студенттеріне халықаралық шәкіртақыны табыстауға келгенімізге өте қуаныштымыз. Бұл іс-шара дәстүрге айналған. Айта кету керек, 14 жылға жуық уақыттан бері оқу орнының үздік студенттеріне шәкіртақы тағайындалып келеді. Шараны өткізуге қолдау көрсеткен Х.Досмұхамедов атындағы Атырау университетінің басқарма төрағасы-ректоры Саламат Идрисовқа және студенттерге алғыс айтамын», - деді Әзірбайжан Республикасының Қазақстандағы Бас консулдығының басшысы Эльчин Маммадов. Сондай-ақ, салтанатты іс-шара аясында Әзербайжанның ұлт көшбасшысы, мемлекет қайраткері Гейдар Алиев пен оның аяулы жары Зариф Алиеваның ғибратты ғұмырына арналған жазушы Эльмира Ахундованың «Мәңгілік махаббат» кітабының тұсауы кесіліп, оқырманға жол тартты. Биыл халықаралық шәкіртақыны жаратылыстану ғылымдары факультетінің 2 курс студенті Исламбек Қайырғалиев, гуманитарлық ғылымдар және өнер факультеті журналистика мамандығының 3 курс студенті, «SAF» студенттік театрының режиссері және жетекшісі Нұрлыгүл Достанова, физика, математика және ақпараттық технологиялар факультетінің 3 курс студенті Ерасыл Байдаулетов, инновациялық білім беру факультетінің 3 курс студенті Назира Жардемғалиева, экономика және құқық факультетінің 3 курс студенті Айкүміс Айтжан, көптілді білім беру факультетнің 4 курс студенті Жаля Маммадзада алды. 14 жылда университеттің 60 тан астам студенті Гейдар Алиев атындағы халықаралық шәкіртақыны алған. «Бүгін Әзербайжан халқының көшбасшысы Гейдар Алиев атындағы стипендиясын алғаныма өте қуаныштымын. Бұл баурылас Әзербайжан елінің атыраулық белсенді студенттерге көрсеткен қолдауы, ерекше құрметі деп білемін. Екі ел арасында достық, ынтымақтастық пен бірлік әрқашанда жалғасып, мәдени-рухани байланыстарымыз нығая түсуіне тілектеспін», - дейді студент Н.Достанова. Х.Досмұхамедов атындағы Атырау университетінде бауырлас Қазақстан мен Әзербайжан мемлекеттері арасындағы ынтымақтасты нығайту мақсатында 2012 жылдан бері «Әзербайжанның тарихы мен мәдениетін зерттеу орталығы» жұмыс істеп келді.

Тізімге қайта оралу