17.05.2024 407

Нысаналы білім беру гранттары бойынша ақпараттық-түсіндіру жұмысы шеңберінде Атырау облысындағы жетекші қазақстандық ЖОО-дар көрмесінің екінші күні өтті. Ғылым және жоғары білім министрлігі мен Атырау облысы әкімдігінің ұйымдастыруымен өтіп жатқан аталмыш көрме аясында өңірдегі жалпы орта білім беретін мектептердегі кәсіби бағдар беруші мамандарға арнайы форум өткізілді. Іс-шараға облыс бойынша 100-ге жуық кәсіби бағдар беруші маман қатысты. Қатысушыларға үш негізгі спикер баяндама жасап, мамандық таңдау, оқуға тапсыру, құжат жинау сынды өзекті тақырыптарды көтерді. Атап айтқанда Ғылым және жоғары білім министрінің кеңесшісі Руслан Емелбаев «Ұлттық бірыңғай тестілеу және гранттар» тақырыбында сөз қозғап, гранттар жан-жақты ақпарат берсе, «JOO High School» мектептер желісінің бағдар беруші бас маманы Диас Асанов «Кәсіби бағдар беруші нұсқаулығы мен бақытты оқушы» бойынша ой бөлісті. Оған қоса профориентолог Айдос Жұманазар «Мамандық таңдаудағы қателіктер» атауымен мамандық таңдаудағы негізгі олқылықтарды талқылап, талапкерлердің жиі жіберетін қателіктерін атады. Содан соң Руслан Емелбаев пен Айдос Жұманазаров бірігіп, форум қатысушыларына арнайы тапсырмалар жүктеді. Мұнда шынайы өмірде кездесетін сан түрлі мәселелерді атап айтқанда мектеп түлектерінің құжат тапсыру кезінде, Ұлттық біріңғай тестілеу және тағы сол сияқты маңызды күндері жіберілетін қателіктерді талдап, шығу жолын қарастырды. Қатысушылар өзара пікір алмасып, шеберлік сағаты сәтті аяқталды. Атыраудағы көрменің екінші күні ата-аналарға арналған арнайы семинармен аяқталды. Семинар барысында болашақ мамандық таңдау, баланың психологиялық күйіне, көңіліне мән беру маңыздылығы, тестке дайындалу бойынша кеңестер берілді. Жалпы, екі күнге созылған Атырау талапкерлеріне арналған көрмеге 4 мыңнан астам 10, 11-сынып оқушылары мен колледж студенттері қатысты.

Тізімге қайта оралу