08.04.2024 321

Халел Досмұхамедов атындағы Атырау Университетінің оқытушы-профессорлары мен қызметкерлері және ерікті студенттері өңірімізді тасқын судан қорғау мақсатында Алмалы ауылында бөгет жасауды жалғастыруда. Бүгін үш ауысымды бөгет тұрғызу жұмыстарына 2000-ға жуық қызметкерлер мен студенттер қатысуда. – Атырау өңіріндегі табиғи төтенше жағдайға байланысты барлық білім беру мекемелері, жұмыс ұйымдары су тасқынынан қорғануға жұмылдырылды. Соның ішінде Х.Досмұхамедов атындағы Атырау университеті бірнеше күннен бері өзімізге бөлініп берілген яғни Алмалы ауылында жұмыс жасауда. Атырау қалалық әкімдігі және Алмалы ауылдық округінің әкімідігі бізге қажетті құрал-жабдықтармен көмектесуде. Әкімдікпен қатар, қаламыздағы құрылыс мекемесінің бірі «JM Capital» команиясы ірі техникаларды бөліп отыр. Сонымен қатар Қазақстанның жоғары оқу орындары университетімізге қолдау көрсету мақсатында өздерінің ұсыныстарын да көрсетуде. Біздің білім ордасының ауызбіршілігінің арқасында үш күнде 19 мың қапшыққа құм салып дайындады. Алдағы уақытта одан да жақсы жұмыс жасап, күшіміздің бірлікте екенін көрсетеміз,- деді университет басқарма аппаратының жетекшісі Гулфайруз Қайырғалиева. Атырау университетінің академиялық мәселелер жөніңдегі проректоры Асхат Ералыұлының айтуынша Жайық суының аталған елді мекенге келу қаупі жоғары. Сондықтан университет ұжымы мен студенттер осы жерде ұзындығы 5 км, биіктігі 3-4 м асатын бөгет тұрғызуда. –«JM Capital» құрылыс компаниясы осы бөгеттерді жасап береді, ал біздің мақсат осы бөгеттерді биіктетіп бірлесе жұмыс жасау. Біздің міндет үрейге жол бермей, жұмыла жүк көтеріп, бірлігімізді танытқан абзал,-деді проректор. Бөгет тұрғызудағы ерікті жастардың жұмыс қарқыны жоғары деңгейде. Отанға деген сүйіспеншілік пен қалаға деген жанашырлық сезім бойлаған әр жас ерікті түрде белсенді қызмет қылуда. –Өңіріміздегі су тасқынының келу қауіпіне байланысты университет студенттері ынтымақтастықпен біріге бөгет тұрғызу жұмыстарына атсалысудамыз. Қаламызға төнген қауіптен қорғану үшін қолдан келген жұмысты жүзеге асыру біздің міндетіміз деп білемін,-дейді 1 курс студенті Мадияр Болат.

Тізімге қайта оралу