«Ән мен жыр керуені»
17 ақпан күні ғылыми кітапхана қызметкерлерінің ұйымдастыруымен қазақ халқының ұлы ақыны, әдеби тілінің негізін салушы, аудармашы, сазгер, дана, дара тұлға А.Құнанбаевтың 175 жылдық мерей тойына орай шығармашылығын насихаттауға арналған «Ән мен жыр керуені» атты әдеби-сазды кеш өткізілді.
Кештің мақсаты - студенттерді ақынның өнегелі өмірімен таныстыру, рухани асыл-мұраларын насихаттап, өлеңдерін, әндерін мәнерлеп айтқызу және әдеби мұрасын зерттеуге тарту. Себебі, жылдан-жылға Абайдың рухани дүниесіне терең бойлап, оның ұлылығының тың қырларын ашып, жаңа сырларына қаныға түсудеміз. «Қазақтың бас ақыны» атанған Абайдың ұлы мұрасы бүгінгі заман талабына сай қайта түлеп, жыл өткен сайын жаңғырып ұрпақ тәрбиесінде өзіндік үлес қосып келеді. Сонымен бірге әдеби кеш барысында «Жастар және Абай» атты ұғымда жастар, яғни Абай мұрасын тануға талпынған Қазақ тілі мен әдебиеті мамандығының 2 курс студенттерімен (кураторы Г.Б.Аяпова) бірлескен жағдайда өтті.
Тағылымы терең әдеби кешке ғылым және халықаралық байланыстар жөніндегі проректор Дидар Ғалымұлы, қадірменді ұстаз, филология ғылымдарының докторы, профессор Қадыр Өтегенұлы қатысып, кітапханашылардың ақын шығармашылығын студенттер мен магистранттарды танытуға арналған істеріне сәттілік білдірді
Кеш барысында «Абай мұрасы - халық қазынасы» атты слайд, кітапханадағы ақынның кітаптары мен зерттеуші ғалымдардың еңбектерінен кітап көрмесі таныстырылды. Сонымен бірге, биылғы жылы «Бір ел - бір кітап» акциясында ұсынылған М.Әуезовтің «Абай жолы» эпопеясы мен Ә.Әлімжановтың «Ұстаздың оралуы» романдарының да кітап қорындағы саны айтылып өтті.
Қазақ тілі мен әдебиеті мамандығының студенттері Абайдың өлеңдері, қара сөздері, әндерін айтып, кештің тәрбиелік мәнін арттырды.
Абайдың шығармашылығына арналған тағылымды кештің соңында кітапхана директоры м.а. Зауреш Өміржанқызы сөз алып,
«Көп адам дүниеге бой алдырған,
Бой алдырып, аяғын көп шалдырған,
Өлді деуге бола ма, ойлаңдаршы,
Өлмейтұғын артына сөз қалдырған, - ұлы ақынымыз Абайдың рухани дүниесіне терең бойлап, оның ұлылығының тың қырларын ашып, жаңа сырларына қаныға түсудеміз. Абай өзінің туған халқымен мәңгі-бақи бірге жасайды, ғасырлар бойы қалың елін қазағын жаңа биіктерге, асқар асуларға шақыра береді. «Қазақтың бас ақыны» атанған Абайдың ұлы мұрасы бүгінгі заман талабына сай қайта түлеп, жыл өткен сайын жаңғырып ұрпақ тәрбиесінде өзіндік үлес қосып келеді» деп, кеш қонақтарына, оқырмандарға, студенттерге алғысын білдіріп, ұлы ақын Абайға арналған шаралар жалғасын табатынын айтты.
