Мұқағали ақынның туған күніне арналған әдеби-сазды кеш өтті
9 ақпан күні Х. Досмұхамедов атындағы Атырау университетінің ғылыми кітапханасында Ғылыми кітапханамен, Көптілді білім беру факультетінің ұйымдастырумен қазақтың әйгілі лирик ақыны, поэзияның Хантәңірі Мұқағали Мақатаевтың туған күніне орай «Бүгін менің туған күнім, ой пәлі-ай» атты әдеби сазды кеші ұйымдастырылды.
Аталмыш кеште, Мұқағали Мақатаевтың өнегелі өмірі мен шығармашылығы, отты да рухты өлеңдері оқылды. Артынан еріп келе жатқан жас буын өкілдері ақынның өлеңдерін оқып, ақынға деген ерекше құрметтерін көрсете білді. Студенттерден құрылған Үміт театры Мұқағали Мақатаевтың өмірін сомдап, қасіртке толы ақынның жастай кеткен тұрмыс тіршілігін бейнелеп, халық назарына ұсынды. Баянмен өлең айтылып, бүлдіршіндерден құрылған «Балдырған тобы» домбырадан жыр төкті. Каспий өңірінің қазіргі заманғы жоғары колледжінің студенттері мен жетекешілеріде өз өнерлерін ортаға салды.
Атырау университетінің Ғылыми кітапханасының директоры Сәттіғұл Мұратбек Қонысқалиұлына, Ұстаз мектебінің директоры Сәнім Уапқызына, Жастар саясаты департаментінің бөлім басшысы Сайран Сабырұлына және Физика, математика және ақпараттық технологиялар факультетінің тәрбие ісі жөніндегі орынбасары Гүлфара Маратқызына сөз беріліп, ақын туралы өз пікірлерімен бөлісті.
