Студенттер «Жылдар сыры» атты жаңа кітаппен танысты
8 ақпан күні Халел Досмұхамедов атындағы Атырау университетінің ғылыми кітапханасында Көптілді білім беру факультеті, Қазақ тілі мен әдебиеті кафедрасының ұйымдастыруымен Қазақ руханиятының көрнекті өкілі, Қазақстан Жазушылар Одағының мүшесі, Әбіш Кекілбайұлының ғылыми мұрасын зерттеу орталығының директоры Қадыр Өтегенұлы Жүсіптің 85 жас мерейтойына орай «Жылдар сыры» жаңа кітабымен танысу кеші өтті.
Шараның алғы сөзі кафедра меңгерушісі, филология ғылымдарының кандидаты, міндетін атқарушы Әбдрахманова Жұмазия Мәжитқызына берілді.
Кеш барысында филология мамандығының студенттері Қадыр Өтегенұлының «Жылдар сыры» атты жинағының әр алуан тақырыптағы мақалаларына тоқталып талдау жасады.Ғалымның бұл мақалалар жинағы Х.Досмұхамедов атындағы Атырау университетінің Ә.Кекілбаев әдебиеттану ғылыми орталығында дайындалған.Қоғамдық өмір, ел тарихы туралы жазбалармен қатар қазақ әдебиетінің көрнекті тұлғаларының шығармашылығы хақындағы зерттеулер, ақын-жазушылар туралы естеліктер, елге еңбегі сіңген тұлғаларға арналған портреттік мақалалар орын алған.Бұл жинақтағы мақалалар мен әртүрлі жазбалардың тәрбиелік, деректік, зерттеушілік бағыттары оқушылардың қызығушылығын туғызатындығы сөзсіз.
Аталмыш шарада, Қадыр Өтегенұлы өзінің өнегелі өмірі мен шығармашылығы туралы студенттерге айтып, «Жылдар сыры» атты кітаптабын ғылыми кітапханаға сыйлыққа тарту етті.Х.Досмұхамедов атындағы Атырау университетінің Ғылыми кітапханасының директоры Сәттіғұл Мұратбек Қонысқалиұлына, Көптілді білім беру факультетінің деканы, филология ғылымдарының кандидаты Сұлтангубиева Айгүл Айтмұханқызына, филология ғылымдарының кандидаты, аға оқытушысы Жұмабаева Гүлнәр Сапиқызына сөз беріліп, мерейтой иесін мерейлі жасымен құттықтап, алға қарай да зор денсаулық пен творчествалық табыстар тіледі.
