Полиция департаментінің мамандарына сертификат табысталды
10 ақпанда Х.Досмұхамедов атындағы Атырау университетінде Атырау облысының Полиция департаментінің қызметкерлері арасында құқықтық сауаттылықты дамыту, сыбайлас жемқорлыққа қарсы мәдениетті қалыптастыру мақсатында «Сыбайлас жемқорлыққа қарсы мәдениет негіздері» курсын бітірген тыңдаушыларға сертификат табыстау рәсімі өтті.
Алғы сөзді Басқарма төрағасы – ректор С.Н. Идрисов алып, Полиция департаментінің ұжымына тұрақты әрі тығыз іскерлік қатынас үшін ерекше ықыласын білдірді: «Университетіміз өңіріміздегі Құқықтану саласы бойынша мамандарды, соның ішінде болашақ полиция қызметкерлерін даярлайтын бірден-бір жоғарғы оқу орны болып табылады. Осы орайда біздің Университет пен Атырау облысының Полиция департаменті арасында жасалған ынтымақтастық туралы Меморандум аясында әрдайым ауқымды бірлескен шаралар өткізіледі. 2020-2021 оқу жылында Атырау облысының Полиция департаменті Тергеу басқармасы мен Экономика және құқық факультетінің арасында «Құқықтану» мамандығы студенттерінен тұратын "Қайсар тергеушілер" клубы құрылды. Клуб студенттеріне арналған дәрістер мен практикалық сабақтардың тақырыптары бекітіліп, сол бойынша жұмыс атқарылуда.
Клуб жұмысында полиция қызметкерлері өздерінің кәсіби білімдерін клуб мүшелерімен бөлісе отырып, қылмыстық істерді жүргізу мен тергеудің заманауи әдістерін үйретеді. Осылайша, полиция мамандары болашақта тергеуші бола алатын клуб мүшелері арасынан білікті мамандар даярламақ.
2019-2020 оқу жылында Атырау облыстық полиция департаменті, Х. Досмұхамедов атындағы Атырау университеті мен М. Бөкенбаев атындағы Қазақстан Республикасы Ішкі істер министрлігінің Ақтөбе заң институты арасында үш жақты Меморандумға қол қойылды.
Меморандумның мақсаты - жастарға кәсіби бағдар беру, қылмыстың алдын-алу және болашақ заңгерлерді тәжірибеге бағдарланған оқытуды қамтамасыз ету. Осы Меморандум аясында 2020 жылдың 5 маусым күні Атырау қаласы Полиция департаментінің ұйымдастыруымен бастапқы арнайы курстарын бітірген қызметкерлерге арнаулы атақтарын табыстау шарасы өтті. Шара барысында басшы құрамның бастапқы арнайы курстарын бітірген қызметкерлерге, яғни біздің Университетіміздің 7 түлегіне алғашқы арнаулы атақтары табысталды.
Аталған Меморандум болашақ мамандардың кәсіби және әлеуметтік бейімделуі бойынша білім беру мекемелері мен жұмыс беруші арасындағы тығыз ынтымақтастықтың нәтижесі болып табылады.»
Атырау облысының Полиция департаменті жанындағы Консультативтік кеңесші органның 2020 жылғы 9 қыркүйектегі №2 хаттамасының шешіміне сәйкес Атырау облысының Полиция департаментінің қызметкерлерінің арасында құқықтық сауаттылықты дамыту, сыбайлас жемқорлыққа қарсы мәдениетті қалыптастыру мақсатында «Сыбайлас жемқорлыққа қарсы мәдениет негіздері» атты 36 сағаттық онлайн курс 7-17 қазан аралығында өтті. Аталмыш курс бойынша дәрісті Х. Досмұхамедов атындағы Атырау унисерситетінің профессор-оқытушылары: PhD докторы Шайхаденов Ренат Нұрлыбекұлы, з.ғ.к. Шаяхметова Жанна Бекполқызы, заң ғылымдарының магистрі Куккузова Эльмира Ізтілеуқызы, п.ғ.к., Нұрмұқашева Салима Қайыржанқызы жүргізді.
Шара соңында Атырау облысы Полиция департаменті Кадр саясаты басқармасы бастығының орынбасары, полиция подполковнигі Нұржан Шаеденов Ғалымжанұлы мен Басқарма Төрағасы-ректор Саламат Идрисов Нұрмұханұлы онлайн курсқа белсенділікпен ат салысқан профессор-оқытушылар мен департамент мамандарына сертификат табыстады.
ПІКІРЛЕР