"Көркем шындықтың мұнарасы" атты әдеби - шығармашылық кеш өтті

19 қазан - жазушы, драматург, Қазақстанның Еңбек сіңірген қайраткері Рақымжан Отарбаевтың туған күні. Осы орайда, университет ректоры Идирисов Саламат Нұрмұханұлының бастамасымен, Көптілді білім беру факультетінің Қазақ тілі мен әдебиеті кафедрасының ұйымдастыруымен Рақымжан Отарбаевтың шығармашылығына арналған «Көркем шындықтың мұнарасы» атты әдеби-шығармашылық кеші өтті. Біртуар тұлғаның әдеби мұрасын насихаттауға арналған бұл шараға университетіміздің профессор-оқытушылар құрамы, Қазақ тілі мен әдебиеті мамандығының студенттері және арнайы шақырылған қонақтар белсенді қатысты. Аталмыш шараның барысы карантин ережелерін сақтау мақсатында онлайн форматта ZOOM бағдарламасы арқылы жүргізілді.
Тағылымы мол онлайн шараға арнайы қонағымыз - Рақымжан Отарбаевтың шығармашылығын зерттеуші, Махамбет сыйлығының иегері, «Дара» монографиясының авторы Ниетқалиева Гүлзада Рахметқызы ешкімге ұқсамайтын өзіндік ерекшелігі бар ірі жазушы туралы өзінің естеліктерімен бөлісті. Зерттеуші ретінде талдау жасаған Гүлзада Рахметқызы Рақымжан Отарбаевтың әдебиеттегі орны, шығармаларының ерекшелігі, драматургияға әкелген жаңалығы туралы құнды естеліктер мен ақпараттармен бөлісті. Ұлы тұлғаның шығармашылығын дәріптеуге бағытталған шараға ф.ғ.д., профессор Қадір Жүсіп, ф.ғ.к. Садыкова Айсұлу, ф.ғ.к. Балтоғаева Жайлы Елепқызы өз баяндамаларын ортаға салып,  құнды ақпараттар көшін ары қарай жалғастырды.  Сондай-ақ, университетіміздің озат студенттері Егінбай Данагүл жазушының «Бас» романын талдап көрсетсе, Мақұлова Ұлболсын өзінің жүрекжарды арнауын оқып, қатысушыларға поэзиялық көңіл-күй сыйлады. Ойларын еркін әрі нақты білдірген студенттердің қатарынан жазушы өміріне шолу жасаған Шугупан Анар мен Амангелдиева Аида. Сонымен қатар, Насимуллина Азиза жазушы-зерттеуші Мира Шүйінішқалиеваның пікіріне өзіндік үн қосып, арнауын оқыды, Анзия Асанова Мереке Құлкенов пен Жұмабай Шаштайұлының жазушы туралы пікірін айтып,Отарбаев туралы жазылған зерттеулік баяндамасын оқыды. Ал, Алтынзер Талғат  әдемі жыр жолдарын оқып,  жанға  жылулық сыйлады. 
Жазушының еңбектері әлемнің тоғыз тіліне аударылған, соның ішінде «Аспандағы ақ көбелектер» еңбегі қытай тіліне аударылса, «Бас» атты романы түрік тіліне аударылған. Қызу талқыға түскен әдемі кеште жазушының шығармашылығын зерттеуге баса мән беріліп, студенттер мен магистранттар үшін ғылыми диссертациялар мен дипломдық жұмыстардың тақырыбы ретінде қолға алу керек деген ұсыныстар айтылды.
Атап өтейік, универстиетіміздің ғылыми кітапханасы Рақымжан Отарбаевтың шығармашылығына арналған кітап көрмесін ұйымдастырды.
Осындай мазмұнды, тарихы терең шығармашылық кеш қоғам қайраткерінің еңбектерін дәріптеп, рухани баюға арналды.

Тізімге қайта оралу