Білім құндылығы әрқашан маңызды

Х.Досмұхамедов атындағы Атырау мемлекеттік университетіне Қазақстан мұсылмандары діни басқармасының наиб мүфтиі, PhD доктор, дінтанушы ғалым Алау Әділбаев келіп, кездесу өткізді.

Рухани жаңғыру бағдарламасы аясындағы білім, ғылым, дін, дәстүр сабақтастығы жайында сөз болған кездесуге ҚМДБ Атырау облысы бойынша өкілі «Иманғали» мешітінің бас имамы, PhD доктор Батыржан Мансуров және де гуманитарлық ғылымдар және өнер факультетінің ұстаздары мен студенттері қатысты.

Жиында Қазақстан мұсылмандары діни басқармасының наиб мүфтиі  Алау Шайқымұлы басқарманың қазіргі кездегі ұстанымы, атқарылған істері және болашақ жұмыс жоспарымен таныстырды. Оның ішінде, басқарма тарапынан білім құндылығына жоғары маңыз беріліп отырғандығын, Құранның өзінде де «Оқу», «Оқы», «кітап», «қалам» сияқты білім мен ғылымға қатысты сөздердің көптеп кездесуінің ислам дінінің білім мен ғылымға баса мән бергендігінің дәлелі ретінде бірнеше аяттар мен сүрелердегі үзінділер арқылы, қарапайым да мәнді дейектермен түсіндірді. Ұстаздардың қоғамдағы мәртебесінің ислам дінінде әрқашан жоғары болғандығы, Құранның халықтың сауаттылығын арттырудағы және жазу мәдениетінің таралуындағы рөлі жөнінде де ғалымның мазмұнды әңгімелерін қатысушылар ұйып тыңдады. Сондай-ақ, дінтанушы ғалымдардың қазақ даласынан шыққан Сығнақи, Кердери, Испиджаби және басқа да ұлы ғалымдардың зерттеулері арқылы жұртшылыққа таныла бастағанын айтып өтті.

Алдағы жылдары «Дін мен дәстүр сабақтастығы», «Тарих тағылымы» ұстанымдары бойынша бірқатар жүйелі жұмыстарды жүзеге асырған діни басқарма өкілдері қазіргі уақытта «Өзгеруді өзіңнен баста» ұстанымын қолға алып, рухани жаңғырудағы адамның жан дүниесі, ақыл, білім, оның ішінде пайдалы білім, білімді тәрбиемен ұштастыру бойынша жұмыстарды қолға алған.

Кездесу барысында тарих ғылымдарының кандидаттары Жұмазия Кенжебаева, Гүлфайруз Қайрғалиева, Х.Досмұхамедов атындағы дарынды балаларға арналған ұлттық гимназияның тарих пәні оқытушысы, магистр Назар Уттібаев өз сауалдарын қойып, ойларын ортаға салды.

Атырау университеті ғылыми жұмыстар жөніндегі проректор Саламат Идрисов қонақтарға мазмұнды пікірлері мен пайдалы ақпараттары үшін қатысушылар атынан ризашылық білдірді.

Тізімге қайта оралу