29.03.2023 105

Көктем келе барлық жерде саялы ағаштар мен жеміс-жидектің көшетін отырғызу науқаны жүргізіледі. Біз де жыл сайынғы  осы дәстүрден жаңылған емеспіз.  Мақсатымыз – университет  аумағын көркейту-көгалдандыру, яғни жасыл желекке айналдыру.  Көптілді білім беру факультетінің студенттері  28 наурыз күні университет  ауласында ағаш көшеттерін отырғызды. Университет келбетінің көркеюіне бастайтын берекелі бастамаға қазақ тілі және әдебиеті кафедрасының аға оқытушысы Нұғыман Алмагүл Қабылқызы  себепкер болып, екі-үш жыл қатарынан тал-терек егумен айналысып келеді. Біз отырғызған ақ акация терегі- өте өсімтал, әдемі хош иісті гүлімен танымал, көп күтімді қажет етпейтін, жарықты сүйетін ағаш. Өз бастамамызбен жасап жатырған жұмысымызды күтпеген  жерден  ректорымыз Саламат Нұрмұханұлы көріп, қолдау білдіріп, шаруаға өзі де кірісіп кетті. «Жүз жылдығын ойлаған халық ағаш егеді, мың жылдығын ойлаған халық саналы ұрпақ тәрбиелейді» дегендей, жұмыла жасалған жұмыс жеңіл келетінін ескерсек, әлі-ақ, білім ордасының   жасыл желегі  жайқалған алаңға айналатынына  сенеміз. Ендігі ойымыз отырғызылған көшеттерге су жіберіліп, күтім жасалса болғаны.
Қаламызда ағаш егу қиындау, топырағы  құнарсыз болғанымен, ниет болса бәрін де жасауға болады. Адамзат өз тарихында осы күнге дейін әлі ағаштан артық ауаны тазартатын бірде-бір қондырғы ойлап таба алмады. Ағаш адамзатқа теңдессіз, қалтқысыз қызмет етіп келеді. Осы бастаманы сәуірдегі сенбіліктерде  басқа да факультет студенттері жалғастырады  деген сенімдеміз.

Тізімге қайта оралу