«Ғасырдың ғаламат ақыны» атты поэзиялық кеш өтті
Мағыналы шараға кафедраның профессорлық-оқытушылар ұжымы және ҚТмӘ 201-1 тобының студенттері қатысты.
Мұхтар Шаханов 1942 жылы 2 шілдеде Оңтүстік Қазақстан облысы Отырар ауданы Шілік ауылында дүниеге келген. Мұхтар Шаханов Қазақстан Жазушылар одағының хатшысы, республикалық «Жалын» журналының бас редакторы, КСРО халық депутаты, Қырғыз Республикасының Төтенше және өкілетті елшісі қызметін атқарған, әлем ойшылдарының басын біріктірген «ХХІ ғасыр және Руханият» атты халықаралық Элита клубының президенті болған. Оның шығармалары жиырмадан аса тілге аударылды.
Ал 1996 жылы Қазақстан Республикасының халық жазушысы, 1994 жылы Қырғыз Республикасының халық ақыны, БҰҰ қоршаған орта бағдарламасы сыйлығының, Түркияның Гебзе қаласында «Түркі тілдес халықтар арасындағы ең үздік әлем ақыны» сыйлығы иегері атанған.
Қазақтың зиялы қауымында кімнің кім екенін анықтайтын 1986 жылдың желтоқсаны еді. Осындай бір қиын кезде құрбан болған жазықсыз жандардың жоқшысы болып, өз тағдырын қылыштың жүзіндей қатерге байлап, халық назарының биігіне ақын М.Шаханов көтерілді. Ешкімнен тайсалмай трибунаға шығып, желтоқсан қырғынының бар шындығын жайып салуы, «Желтоқсан эпопеясының» жазылуы, осы тақырыпта бірнеше толғауларға қалам сермеуі өз халқына деген махаббатынан басқа ештеңе болуы мүмкін емес.
Туған халықтың парасат биігін меңгеру, оның жеңілісі мен жеңісін, ғасырдың жаңбыры шайып, күні қақтаған жалаулы дәстүрін, қалаулы әдеп-ибасын, алаулы достық-махаббатын өз жүрегінің елегінен өткізуі – қаламгердің талғамы, даралығы.
Шара барысында М.Шахановтың шығармашылығына байланысты студенттер көркемсөз оқып, Мұхтар Шахановтың сөздеріне жазылған Шәмші Қалдаяқовтің әні «Арыс жағасында» және «Жайықпен жүздескенде» әні орындалды. Соңымен қатар, Рамазан Қанатовтың орындауында «М.Шахановқа арнау» атты өленін оқып берді.
Кеш соңында гуманитарлық ғылымдар магистрі, аға оқытушы Н.А.Атаханова, филология магистрі, аға оқытушы А.Н.Дәулетова шараға қатысқандарға ризашылығын білдірді, қорытындылады.
ПІКІРЛЕР