п.ғ.д. Б.Т.Барсайдың алғашқы сабағы өткізілді.
Математика және математиканы оқыту әдістемесі кафедрасының профессоры, п.ғ.д. Б.Т.Барсайдың "Мұғалімнің кәсіби құзыреттілігі: математика пәнін құзыреттілік тұрғыда оқыту" академиялық мектебінің 2018-2019 оқу жылына арналған жұмыс жоспарына сәйкес осы оқу жылындағы алғашқы сабағы өткізілді.
Сабақты академиялық мектептің жетекшісі математика және математиканы оқыту әдістемесі кафедрасының профессоры, п.ғ.д. Б.Т.Барсай жүргізді. Ол академиялық мектеп құрамы мектеп математик мұғалімдерімен, университет оқытушыларымен, магистранттармен толыққанын атап өтті. Олардың ішінде облыстық әдістемелік орталық физика-математика пәндерінің әдіскері С.М. Айтжанова да бар.
Академиялық мектеп сабағында жетекші жаңа оқу жылындағы атқарылатын жұмыс жоспарымен таныстыра келіп, күн тәртібіндегі негізгі мәселе "Оқушылардың функционалдық сауаттылығын (математикалық сауаттылығын) қалыптастырудағы мұғалімнің кәсіби құзыреттілігі" туралы баяндады.
Функционалдық сауаттылықты дамытудың жалпы бағдары Қазақстан Республикасында білім беруді дамытудың 2011-2020 жылдарға арналған мемлекеттік бағдарламада анық көрсетілген. Осы бағдарламаны басшылыққа ала отырып, ҚР-сы Үкіметінің 2012 жылғы 25 маусымдағы №832 қаулысымен «Мектеп оқушыларының функционалдық сауаттылығын дамыту жөніндегі 2012-2016 жылдарға арналған Ұлттық іс-қимыл жоспары» бекітілгені белгілі.
Функционалдық сауаттылықты бағалау технологиясы 15 жастағы білім алушылардың біліктілік жетістігін бағалаудың 6 деңгейін қамтиды. Ең жоғары шек - 5 және 6 деңгей –өздігінен ойлау, талдау және өз болжамын ұсыну іскерлігі, 4-3деңгей- жаңа ақпарат алу үшін бар білімі мен іскерлігін қолдану қабілеті, 2-деңгей- қолдану іскерлігі, 1 деңгей - төмен деңгей, қарапайым білім мен тапсырманы орындаудың аздаған мүмкіндігі.
Еліміздің 15 жастағы оқушылары білім жетістіктерін тәуелсіз бағалау мониторингіне және PISA Халықаралық салыстырмалы зерттеуіне 2009 жылдан бері қатысып келеді. PISA Халықаралық салыстырмалы зерттеулері білім алушылардың оқу сауаттылығы, математикалық сауаттылық және жаратылыстану-ғылыми сауаттылығы бойынша тексеріледі. PISA зерттеуі 2009 ж. – оқу сауаттылығы; 2012 ж.- математикалық сауаттылық; 2015 ж. – жаратылыстану ғылыми сауаттылық бойынша өтті. 65 елден оқушылар қатысты. Қазақстан математикадан -53 орын, жаратылыстану ғылыми сауаттылық бойынша -58 орын, оқу сауаттылығы бойынша - 59 орын алды (PISA, TIMSS зерттеулерінің тапсырмалары негізінде оқушылардың математикалық сауаттылығын дамыту. Әдістемелік құрал. – Астана: Ы.Алтынсарин атындағы ҰБА, 2014. – 46 б.).
Бұл төмен көрсеткіш, сондықтан оқушылардың функционалдық сауаттылығын, оның ішінде математикалық сауаттылығын жеткілікті деңгейде қалыптастыру біздің алдымыздағы ең маңызды міндеттердің бірі болып табылады дей келіп, оқушылардың математикалық сауаттылығын қалыптастыру жолдарына тоқталды.
Академиялық мектеп мүшелері сабаққа белсене қатысты. Е.Палжанов оқушыларды критериалды бағалау мәселелері бойынша өз тәжірибесімен бөлісті. Оған математик мұғалімдер қызығушылық танытты. Мұғалімдер Кушенова Ә., Шалапиева А., Шамғонова М. т.б. математикалық білім беруде дарынды балалармен жұмыс, математика сабақтарында қалыптастырылатын түйінді құзыреттіліктер, облыстық әдістемелік орталығының физика-математика пәндерінің әдіскері Айтжанова С. облыс мектептеріндегі математикалық білім беру және өзара байланыс мәселелері т.б. туралы пікірлерімен бөлісе отырып, академиялық мектептің жұмысына ризашылық білдірді және жоспарға сай бас қосып, келелі мәселелерді талқылап отыру мектеп мұғалімдері мен университеттің байланысын нығайтатындығына сенім білдірді.
Академиялық мектеп сабағына факультет деканы Б.З.Кенжегулов, кафедра меңгерушісі Н.Қ.Шаждекеева, Билялова Ж.Т., Тұржігітова Ғ.Ж., Мұханбетжанов С.Т. тағы басқа профессор - оқытушылар қатысты.
ПІКІРЛЕР