Жауыров Теңдік Жауырұлы
.jpg)
Өмірбаян
Жауыров Теңдік Жауырұлы (Атырау қаласы Томарлы ауылында 13.04.1934 жылы туған) - танымал журналист-қаламгер, академиялық доцент.
Гурьев педагогикалық училищесін және С.М.Киров атындағы Қазақ мемлекеттік университеті филология факультетінің журналистика бөлімін үздік дипломмен (1957 ж.) бітірген.
Еңбек жолын облыстық «Социалистік құрылыс» (қазіргі «Атырау») газетінде әдеби қызметкер болып бастаған. 1961-1962 жылдары Қызылқоға аудандық «Социалистік еңбек» (қазіргі «Қызылқоға»), 1963-1971 жылдары Махамбет аудандық «Малды өңір» (қазіргі «Жайық шұғыласы»), 1976-1978 жылдары облыстық «Коммунистік еңбек» («Атырау») газетінің редакторы, 1978-1995 жылдары «Атырау» газетінің Бас редакторы қызметтерінде істеген. Т.Жауырұлы Махамбет аудандық және облыстық газеттерге басшылық жасаған тұста аталған басылымдар бұқаралық жұмысты жолға қойғаны үшін республикада алғашқылардың бірі болып М.И.Ульянов атындағы Бүкілодақтық сыйлыққа ие болған.
Әр жылдары Атырау облыстық партия комитетінде баспасөз жөніндегі нұсқаушы баспасөз жөніндегі нұсқаушы (1971-1976 жж.) және бөлім меңгерушісі (1978-1987 жж.) Журналистер одағы облыстық ұйымы басқармасының төрағасы, халықаралық саяси-апталық «Түркістан» газетінің Батыс аймақтағы меншікті тілшісі (1996-1997), «Ар-честь» (Сахара) және «Вечрний Атырау-Атырау ақшамы» гзеттері Бас редакторының бірінші орынбасары (1997-2001 жж.), Х.Досмұхамедов атындағы Атырау мемлекеттік университеті журналистика бөлімінде оқытушы (2001-2002) қызметтерінде болған.
«Аудан ақиқаты және жұмысшы село тілшілері» (1977), «Каспий құдаң емес» (1996), «Мұнай тарихы», «Таумыш» (1999), «Атырау әзілқойлары» (2002), «Жер кіндігі» (2003), Атырау ақын-жазушыларының 100 томдығында, «Желідегі ағын» (2006) атты ғылыми-зерттеу, деректі публицистикалық кітаптары жарық көрген. Теңдік Жауырұлы тұңғыш Атырау энциклопедиясы авторларының бірі.
«Құрмет Белгісі» орденімен, «Еңбекте үздік шыққаны үшін», «Ерлік еңбегі үшін», «Еңбек ардагері» медальдарымен, Қазақ КСР Жоғарғы Кеңесі Президиумының Құрмет грамтомасымен және басқа да көптеген Құрмет грамоталарымен, Алғыс хаттармен марапатталған. Қазақстан Журналистер одағы сыйлығының лауреаты (1994).
