"Үздік оқытушы-2019" п.ғ.д., профессор

Джанзакова Шолпан Исағалиқызы 1960 жылы 13 қарашада Гурьев қаласында  дүниеге келген.
Шолпан Исағалиқызы 1968 жылы Гурьев қаласындағы Ю.Гагарин атындағы орта мектепке барып, 1978 жылы оны үздік аяқтап, сол жылы Гурьев педагогика институтының биология-химия факультетін оқуға түсті.
Ол 1983 жылы Гурьев педагогика институтының биология-химия факультетін өте жақсы аяқтап, қаладағы №7 орта мектепте биология-химия пәнінің оқытушысы қызыметін атқарды. Шолпан  Исағалиқызы Х.Досмұхамедов атындағы Атырау мемлекеттік университетінде 1987 жылдың 1 маусымнан бастап Педагогика және психология кафедрасының оқытушысы, 1991 жылғы 2 ақпаннан бастап кафедраның аға оқытушысы, 2000 жылғы 22 қаңтардан Психология кафедрасының меңгерушісі, 2003 жылдың 1 желтоқсаннан бастап кафедраның аға ғылыми қызметкер лауазымын, 2005 жылдың 27 маусым айынан бастап Сырттай қысқартылып оқыту факультетінің деканы қызметін атқарды. 2008 жылдан бастап университет жанындағы педагогика ғылымдарының докторы ғылыми дәрежесін беру беру жөніндегі БД 14.61.02 біріккен диссертациялық кеңестің ғалым хатшысы, 2011 жылдан бастап  «Педагогика» кафедрасының  меңгерушісі қызметін атқарып келеді.
Шолпан Исағалиқызы кафедрада «Педагогика», «Педагогика тарихы», «Этнопедагогика», «Тәрбие жұмысының әдістемесі», «Әлеуметтік педагогика», «Жоғары мектеп педагогикасы», «Ғылыми зерттеулерді  ұйымдастыру мен жоспарлау» , «Педагогикалық зертеулердің әдіснамасы мен әдістері» пәндерінен  студенттер мен магистранттарға дәріс және практикалық сабақтар жүргізеді. Ол өзі өткізетін әрбір сабағына тыңғылықты дайындалып, көптеген әдебиеттерді, көрнекіліктерді пайдаланып, әрбір сабағына жауапкершілікпен қарайтын, студенттер мен магистранттардың, ізденушілердің алдында үлкен беделі бар, ұйымдастырушылық қабілеті зор, принципшіл ұстаз.
Шолпан Исағалиқызы Ресейдің ғылыми орталығы Мәскеу қаласындағы Ұлттық білім беру мәселелері институтындағы белгілі ғалым, академик Г.Н.Волковтың жетекшілігімен қазақ халқының этнопедагогикасын ғылыми тұрғыдан   тыңғылықты зерттеуді қолға алды. Ол аталған тақырыпты жан-жақты зерттеп, 1998 жылы Ресейдегі аталған институт жанындағы мамандандырылған К 113.09.01 Кеңесте «Этнопедагогизация экологического воспитания младших школьников в казахской школе» тақырыбында кандидаттық диссертациясын сәтті қорғады.
Джанзакова Ш.И. қазақ этнопедагогикасын зерттеуші белгілі ғалым, профессор К.Ж.Қожахметованың ғылыми кеңесшілігімен «Этнопедагогиканы жеке оқу пәні ретінде құрудың ғылыми негіздері» атты докторлық диссертациясын 2007 жылы Е.А.Букетов атындағы Қарағанды мемлекеттік университетінде сәтті қорғап шықты.
Осы салада ғалымның бірнеше зерттеулерін негізге  алуға болады, атап айтқанда оның «Ғылыми-педагогикалық зерттеу әдістері», К.Ж.Қожахметовамен бірлесе жазылған «Этнопедагогика как самостоятельная учебная дисциплина (теоретико-методологический аспект)», К.Ж.Қожахметова және Ш.Т.Таубаевамен бірігіп жазған «Методология общей и этнической педагогики в логико-структурных схемах»  атты оқу құралдары, А.Қ.Дүйсенбаевпен бірлесіп жазған, «Түркі халықтарының этнопедагогикасы» оқу-әдістемелік кешені (7,1 б.т) жарық көрді.
Ш.И.Джанзакова тынымсыз зерттеушілік қарымымен қазақ этнопедагогикасы ғылымындағы әлі де көп зерделеуді қажет ететін этнопедагогиканың әдіснамасы мен этнодидактика бағытын зерттеп жүрген белгілі  ғалымдардың бірі. Зерттеуші өзінің ғылыми ізденістерін іс жүзінде ұдайы қолданысқа енгізіп жүреді. Соның айғағы ретінде оның «Этнопедагогиканың жеке пән ретінде ғылыми құрылымы» атты монографиясы (2020 ж.) және «Бастауыш сынып оқушыларының этноэкологиялық мәдениетінің мазмұны» (2006 ж.) атты оқу-әдістемелік құралы және «Этнопедагогика» (2007 ж.), «Этнопедагогика – жеке оқу пәні» (2015 ж.) атты оқу құралдары, «Тәрбие жұмысының теориясы мен әдістемесі» (2020 ж.) оқулығы, авторлық бірлестікте «Әлеуметтік педагогика» (2020 ж.) терминдік сөздігі  жарық көрді.
Ш.И.Джанзакованың соңғы бес жылдықта ЖАҚ тізіміндегі журналдарға 25-ке жуық мақаласы, Томсон, Скопус журналдарына 5 мақаласы. Халықаралық және республикалық конференциялардың жинағында ондаған мақалалары жарық көрді.
Профессор Шолпан Исағалиқызының жетекшілігімен Джонисова Гулжиян Кабдолгалиевнаның  «Бастауыш мектептің оқу тәрбие үдерісінде оқушылардың ұлттық құндылық бағдарын қалыптастыру», Альмурзаева Бибигуль Келисовнаның «Педагогические особенности саморазивития личности учителя современной школы», Исламгалиева Виктория Жанабаевнаның «Использование дидактического материала в формировании культуры нравственных отношений младших подростков в целостном педагогическом процессе школы», Абдол Элеонора Досжанқызының  «Кенжалы Аймановтың қоғамдық-ағартушылық қызметі және педагогикалық идеялары» тақырыптарындағы кандидаттық диссертациялық жұмыстары сәтті қорғалды, сонымен  қатар, ол 30-ға жуық магистрлік  жұмыстарға жетекшілік  етті.
Джанзакова Шолпан Исагалиевна өзінің жемісті еңбегінің нәтижесінде 2001 жылы қазан айында Атырау облысының әкімінің Құрмет грамотасымен, 2006 жылы қазан айында Қазақстан Республикасы Білім және ғылым министрлігінің Құрмет грамотасымен, 2007 жылы тамыз айында Қазақстан Республикасы Білім және ғылым министрлігінің «Қазақстан Республикасының ғылымын дамытуға сіңірген еңбегі үшін» белгісімен,2015 ж Ы.Алтынсарин төс белгісімен, 2019 жылы А. Байтұрсыновтың күміс медалімен марапатталды. 2016 жылы Қазақстан педагогикалық ғылымдар академиясының толық мүшесі (академигі) болып сайланды. 2019 жылы Қазақстан ЖОО-ның үздік оқытушысы грантына ие болды.
Джанзакова Ш.И өз білімін жетілдірудегі бағытында Германия (Дюссельдорф (2012 жылы және 2019 жылы)  қаласында білім жетілдіру институтында, Париж КОНКОРД (2015) академиясында стажировкадан өтті. 2017ж Назарбаев зияткерлік мектептің Педагогикалық шеберлік орталығының курсынан (232 сағат) өтті.
Ғалым Ш.И.Джанзакова қазақ  этнопедагогикасын рухани жаңғырумен ұштастырып, тың  проблемаларды зерттеп, ғылыми айналымға енгізуге жұмыстануда.

Тізімге қайта оралу