Билялова Жұпар Тәренқызы
ӨМІРБАЯН
Билялова Жұпар Тәренқызы – педагогика ғылымдарының кандидаты, қауымдастырылған профессор. Х.Досмұхамедов атындағы Атырау мемлекеттік университетіндегі жалпы ғылыми-педагогтық өтілі 42 жыл. 1958 жылы 2 ақпанда Атырау облысының Құрманғазы ауданындағы Қошалақ елді мекенінде дүниеге келген. Мектепке алты жасынан барып, 1974 жылы Қызылқоға ауданының Сағыз селосындағы Кенбай орта мектебін үздік бітірген. 1974-78 жылдар аралығында Қазақ Мемлекеттік қыздар педагогикалық институтының физика-математика факультетінде математика мамандығы бойынша білім алып, «математика пәні мұғалімі» біліктілігін иеленген. Жоғарғы оқу орнын бітірген жылы жолдамамен келіп, Гурьев педагогикалық институтына жұмысқа орналасады. Еңбек жолы, педагогтық қызметі 1978 жылдың 10 тамызынан Гурьев мемлекеттік педагогикалық институтында оқытушылықтан басталады. 1978-2010 жылдар аралығында «Бастауыш оқытудың педагогикасы мен әдістемесі» кафедрасында 33 жыл қызмет еткен. Университет көлемінде «Бастауыш оқытудың педагогикасы мен әдістемесі» кафедрасының қалыптасуына мен дамуына қомақты үлесін қосқан, есімін шәкірттері мадақтайтын ардагер ұстаздардың бірі, бастауышта математиканы оқытудың теориясы мен әдістемесінің білікті маманы. 2001-2004 жылдары - педагогика, психология және өнер факультеті деканының орынбасары, 2004-2006 жылдары «Бастауыш оқытудың педагогикасы мен әдістемесі» кафедрасының меңгерушісі лауазымдарын атқарды. 2011 жылдан «Математика және математиканы оқыту әдістемесі» кафедрасында еңбек етіп келеді. 2001 жылы Ы.Алтынсарин атындағы Қазақ Білім академиясының жанындағы диссертациялық кеңесте "Бастауыш сыныптарда математиканы оқытуда оқу есептерін пайдалану әдістемесі" деген тақырыпта 13.00.02 -Математиканы оқытудың теориясы мен әдістемесі мамандығы бойынша кандидаттық диссертация қорғап, педагогика ғылымдарының кандидаты ғылыми дәрежесін, 2019 жылы Білім және Ғылым саласындағы Бақылау комитетінің шешімімен «қауымдастырылған профессор» ғылыми атағын иеленді. Республиканың ғылыми және педагогикалық жұртшылығы Жұпар Тәренқызын ғалым-әдіскер ретінде жақсы біледі. Түрлі халықаралық ғылыми-теориялық, практикалық конференциялар жинақтарында, республикалық ғылыми-әдістемелік басылымдарда, алыс-жақын шетел басылымдарында 70-тен астам ғылыми мақалалары, оның ішінде алты мақаласы Скопус, Томсон Рейтер басылымдарында жарық көрген. Үш оқу-әдістемелік еңбектің, "Технология развития логического мышления учащихся в процессе обучения математике в начальных классах" атты монографияның авторы. Алған марапаттары: Гурьев педагогикалық институтының 40 жылдығына орай облыстық комсомол комитетінің Құрмет грамотасымен, Х.Досмұхамедов атындағы Атырау мемлекеттік университеті басшылығы тарапынан мақтау қағазымен, бірнеше рет алғыс түрінде марапатталған. 2008 жыл 2 ақпанда Атырау қаласы әкімінің Алғыс хатын алған. 2009 жылы көп жылғы білім берудегі, жас ұрпақты тәрбиелеудегі еңбегі үшін «Ы.Алтынсарин» төсбелгісімен марапатталған. ҚР Білім және ғылым министрлігі өкілі ретінде атқарған ҰБТ-дағы жұмысы үшін Павлодар облысы Қашыр ауданы әкімшілігінің алғыс хатына ие болған. 2012 жылы бірнеше мәрте ҰБТ-ға қатысып, өз міндетін жоғары дәрежеде атқарғаны үшін ҚР Білім және Ғылым министрлігі Ұлттық тестілеу орталығының 20 жылдығы тұсында Алғыс хаты және Құрмет грамотасына ие болған. 2013 ж.Атырау облыстық маслихатының Алғыс хатын алған. 2018ж. «Білім беру ісінің құрметті қызметкері» атағын иеленіп, төсбелгісімен марапатталған. Жанұясында зайыбы және екі қызы бар. Қазіргі уақытта Х.Досмұхамедов атындағы Атырау мемлекеттік университетінің «Математика және математиканы оқыту әдістемесі» кафедрасында қауымдастырылған профессор лауазымында жұмыс істейді. Физика, математика және ақпараттық технологиялар факультетінің кеңесі мүшесі, университеттің Оқу Әдістемелік Кеңесінің мүшесі. Студенттер арасында және ұжымда еңбегімен құрметке ие болған ардагер-ұстаз. Топ жетекшісі, факультет комсомол ұйымының хатшысы, кураторлар кеңесінің төрайымы, математикалық үйірме, әдістемелік бірлестіктің жетекшісі, факультет әдістемелік кеңесінің жетекшісі, кафедраның оқу-әдістемелік семинарының жетекшісі, т.б. қоғамдық және оқу-әдістемелік жұмыстарды атқаруда жинақтаған тәжірибесі мол, педагогтық ұстанымы биік ұстаз. Ана тілін қастерлейтін, тілдік қоры бай, сөзге шешендік қасиетке ие тұлға.