2022 жылдың 17 наурызы күні

    Алматы қаласындағы ҚР Ұлттық Кітапханасында екі ғасыр арасындағы қазақ күй керуенінің көшін жалғастырушы әрі жаңғыртушы айтулы өнер иесі, күйші Дина Нұрпейісованың туғанына 160 жыл толуына орай жарық көрген «Түркі әлемінің ұлы композиторы Дина Нұрпейісова» атты қазақ-орыс, түрік-ағылшын тілдерінде жарық көрген кітаптың тұсаукесері өтті.
   Дәулескер күйшінің тұлғасын халықаралық деңгейде танытуға бағытталған Халықаралық зерттеу жобасы Атырау облысы мәдениет, архивтер және құжаттама басқармасының облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығының тапсырысы бойынша шығарылды.
   ҚР еңбек сіңірген артисі, күйші Айгүл Үлкенбаеваның жетекшілігімен жүзеге асырылған жоба аясында еліміздің мұрағатарымен қатар Өзбекстан, Ресей мемлекеттік архивтеріне іссапарлар жасалып, Динаның өміріне қатысты қызықты мағлұматтар жиналып, жүйеленіп, алғаш рет жарияланып отыр. Сонымен қатар мемлекеттік архивтерден материалдар іздестіру барысында қол жеткізілген дүниелер де тұңғыш рет қамтылды.
   Жобаның ғылыми кеңесшісі Х.Досмұхамедов атындағы Атырау университетінің ұстазы, өнертану кандидаты Бақыт Тұрмағамбетова дөңгелек үстелді жүргізді.
   Іс-шараға Мәдениет пен Өнер салалары бойынша белгілі ғалымдар, өнер қайраткерлері, музыкатанушылар, танымал дәстүрлі орындаушылар қатысты. Тұсаукесер лентасын Құрманғазы атындағы Қазақ Ұлттық консерваториясының ректоры, күйші, дирижер Арман Жүдебаев пен Қазақстан Жазушылар Одағы басқарма төрағасының орынбасары, жазушы, публицист Мереке Құлкенов қиды.
   Тұсаукесерде «Айгүл Үлкенбаеваның мектеп-студиясының» түлектері мен оқушылары қатысып, өнер көрсетті.