Сыршыл сезімге толы жыр кеші
Гуманитарлық ғылымдар және өнер факультетінің студенттерінің ұйымдастыруымен шындықтан туған шынайы поэзияның иесі, қара өлең шебері, ақын Мұқағали Мақатаевтың 90 жылдығына арналған "Есіңе мені алғайсың" атты жыр кеші өтті.
Ақынның өлеңдерінің көпшілігі лиризм бағытында жырланады. Одан терең толғаныс, жүректі тебірентер орамды ойлар айқын көрінеді. Осындай туындылар еріксіз әдемі биге бастайды. Студенттердің вальсі сырлы кештің көркін қыздырды. Сондай-ақ жыр сүйер студенттердің орындауында ақиық ақынның "Көңіл де ән көгімде, күн көруші ем", "Ата Жайық", "Әке", "Қыз баланың сұлулығы" т.б. тамаша өлеңдері оқылды. "Аққулар ұйықтағанда" поэмасының желісі бойынша сахналанған қойылым кешті одан әрі әсерлете түсті.
"Ақ қырау тұрған ақпанда, ағаштар сырға таққанда, Бозарып тұрып ақ таңда, Есіңе мені алғайсың" - деп ақын өзі толғағандай, халқының мәңгілік есінде қалар дарабоз, біртуар Мұқағалидың есімі жыр сүйер жүректерде сақтаулы. Журналистика мамандығының 103 тобымен ұйымдастырылған кеш соңы ақынның сөзіне жазылған әдемі әнмен қорытындыланды.
ПІКІРЛЕР