ЕСІҢЕ МЕНІ АЛҒАЙСЫҢ
9 ақпанда Жастар саясаты департаментінің ұйымдастыруымен "Есіңе мені алғайсың" атты поэзиялық-сазды кеш өтті. Аталмыш шара Хантәңірінің мұзбалағы, ақиық ақын, тау тұлғалы талант, дарынды дарабоз, «Ғасыр ақыны» атанған, миллион сырлы сезімнің иесі – Мұқағали Мақатаевқа арналды. Тірі болса арда ақын 90 жасқа толар еді. Дегенмен, жарты ғасырға жуық ғұмыр сүрсе де, бар өмірі мен өлеңін халқына арнап, поэзия кеңістігінің өшпес шоқжұлдызына айналып үлгерді. Ақынның образын сомдаған студент кеш шымылдығын "Бүгін менің туған күнім" атты ақын өлеңімен ашты. Поэзиялық сәтпен серпілткен студенттер ақынның "Арманда, ұлым, арманда", "Поэзия, менімен егіз бе едің?!", "Өкінбеймін" өлеңдерін оқыса, "Музыка және өнер" кафедрасының студенттері әсем әндермен көрермендерді тамсандырып, тамаша көңіл-күй сыйлады. Зал көрермендері де, Зум платформасымен қатынасып отырған тыңдармандар да әсерлі кештен ерекше сезімде болғанын жасырмады. Бұл ақынның құдіреті, шабыттың шырқау шыңы, қазақ өлеңінің киесі. Ақынның өмірбаяны мен еңбек жолы видеокөрсетілім ретінде көрермендер назарына ұсынылды. Рухани кеш сыйлаған өнерлі студенттерге университет ұжымы атынан шексіз алғыс айтылды.
ПІКІРЛЕР