Ж.НӘЖІМЕДЕНОВ ЖӘНЕ ҚАЗАҚ ПОЭЗИЯСЫНЫҢ КӨРКЕМДІК ДАМУ БАҒЫТТАРЫ
27 қарашада қазақ әдебиетінің біртуар қаламгеріне арналған Халел Досмұхамедов атындағы Атырау университетінің ұйымдастыруымен «Болашаққа бағдар: рухани жаңғыру» бағдарламасының аясында көрнекті ақын, Қазақстан Республикасы Мемлекеттік сыйлығының лауреаты, Әнұран авторларының бірі – Жұмекен Нәжімеденовтің туғанына 85 жыл толуына орай «Ж.Нәжімеденов және қазақ поэзиясының көркемдік даму бағыттары» атты халықаралық ғылыми-теориялық онлайн конференция өтті.
Конференцияның мақсаты «Рухани жаңғыру» бағдарламасы аясында Жұмекен Нәжімеденов мұрасын насихаттау, ғылыми зерттеу жүргізу, жас ұрпақтың қазақ поэзиясына деген қызығушылығын арттыру.
Халықаралық деңгейде ұйымдастырылған конференцияға профессор Қадыр Жүсіп, «Жұлдызды Жұмекен» кітабының авторы, философия ғылымдарының докторы, профессор Ғарифолла Есім, ҚР Мемлекеттік сыйлығының иегері, ақын Ақұштап Бақтыгереева, Қазақстан мен Қырғызстанның еңбек сіңірген қайраткері, композитор Илья Жақанов, ҚР Мемлекеттік сыйлығының лауреаттары, белгілі қаламгерлер Мереке Құлкенов пен Есенғали Раушанов сынды тұлғалар айшықты ойларын ортаға салады.
Бұдан басқа, басқосуға «zoom» бағдарламасы арқылы Польша, Түркия, Әзірбайжан, Ресей, Қытай, Қырғызстан ғалымдары, сонымен қатар, Қазақстан Республикасы Мемлекеттік сыйлығының лауреаттары мен ҚР Президент сыйлығының лауреаттары, Қазақстан Ұлттық Ғылым Академиясының академиктері, абайтанушы, жұмекентанушы ғалымдар мен ақын-жазушылар қатынасты.
Шара барысында философия ғылымдарының докторы, профессор Ғарифолла Есімнің «Ғұлама-Наме» ғылыми трилогияның тұсауы кесілді.
ҚР Мемлекеттік сыйлығының иегері, ҚР Еңбек сіңірген қайраткері, «Құрмет» Ордені мен «Алаш» әдеби сыйлығының иегері, ақын Ақұштап Бақтыгерейқызы сөз сөйлеп, Жұмекен Нәжімеденов туралы өзінің естелігімен бөлісті. Басқарма төрағасы-ректор Саламат Нұрмұханұлы Ақұштап Бақтыгерейқызына Ғылыми Кеңес шешімімен тағайындалған Атырау университетінің құрметті профессоры атағын тапсырды
«Үш қоңыр» газетінің бас редакторы, «Болат» медиа мекемесінің директоры, баспагер Болат Батыр сөз сөйлеп, университет басшылығына ризашылығын білдіріп, Басқарма төрағасы-ректор Саламат Нұрмұханұлына Алғыс хат табыстады.
Жиынға қатысқан ақынның үлкен қызы Айкен Жұмекенқызы өз рахметін айтып. Есімі ел есінде сақталатын тұлғаның мұралары академиялық топтама ретінде шығару жоспары бар екенін айтты.
– Біздің әкеміз адамгершілікті жоғары қойған еңбекқор жоғары талғамды тұлға болды. Әкеміздің бұған дейін 7 томдық топтамасы шықты. Бірақ, әкеміздің шығармашылық мұрасын аша түскен сайын, оның жарық көруге, оқырманына жол тартуға дайын шығармалары әлі де мол екендігіне көз жеткіздік. Болашақтың еншісіндегі жоспарға енгізіп, академиялық топтамасын шығаруды ойластырып жүрген жайымыз бар,- деді Айкен Жұмекенқызы.
Айта кететін жәйт, конференциядан бұрын Ж.Нәжімеденов атындағы №2 орта мектептің алдына еңселі ескерткіш-бюст бой көтерді. Салтанатты ашылу рәсіміне бір топ зиялы қауым өкілі қатысып, одан әрі салтанат сарайы алдындағы ақын ескерткішіне гүл шоқтарын қойып, рухына тағзым етті.
ПІКІРЛЕР