«Батыс Қазақстан әншілік мектебі» тақырыбында шеберлік сағаты өтті

22 қазан күні Х.Досмұхамедұлы атындағы Атырау университеті Гуманитарлық ғылымдар және Өнер факультеті «Журналистика», «Музыка және өнер» кафедраларының ұйымдастыруымен ҚР Еңбек сіңірген қайраткері, «Құрмет» орденінің иегері, қауымдастырылған профессор Айгүл Қосанованың «Батыс Қазақстан әншілік мектебі» тақырыбында шеберлік сағаты өтті. Шара модераторы әрі ұйымдастырушысы - Гуманитарлық ғылымдар және Өнер факультеті Журналистика кафедрасының меңгерушісі Мәншүк Мұқашева болды. ZOOM платформасы арқылы өткен шеберлік сағатына Х.Досмұхамедұлы атындағы Атырау университетінің оқытушылары мен студенттерінен бөлек республикамыздың өзге өңірлерінен де көрермендер қатысты. Атап айтсақ, Махамбет ауданы З. Ещанова атындағы өнер мектебі және Семей қаласы Абай ауданындағы Ж.Кәрменов атындағы мектебінің оқытушылары мен оқушылары және шараның ең кішкентай көрермені ретінде Ақтөбе қаласынан 5-сынып оқушысы Айкөркем Амантай мен т.б. 50-ден аса көрермендер қатысты.

Онлайн шарада Сегіз сері туралы, «Желкілдек» әуенінің эстрадалық өзгеріске түсуі, батыс қағыстарының нотаға түсуі, т.б. қызықты сұрақтар қойылып, толыққанды жауаптар айтылды. Кеш қонағы ҚР Еңбек сіңірген қайраткері Айгүл Қосанова шара барысында қатысушылардың өтініші бойынша халық әндері «Айнамкөз», «Желкілдек» пен Ғ.Құрманғалиевтің «Әнші дауысы» әндерін орындады. ZOOM платформасы арқылы өткен мазмұнды шеберлік сағаты өте қызықты өтті.

Тізімге қайта оралу