Талантты мүсіншінің туындылары - қаламыздың көркі
Еліміз егемендікке қол жеткізген кезден бері тоқтаусыз кемелденіп, көркейіп келе жатырған өзіміздің Атырау қаламызға ерекше шырай беретін Жайық өзенінің оң жағалауындағы демалыс саябағының құрылысы 2019 жылы басталған болатын. Осы саябақтың бір бөлшегі ерке Жайық өзенінің ең көрікті жерінде орналасқан Х.Досмұхамедов атындағы Атырау университетінің тұсындағы жағалауға жоба бойынша «Жастар» аллеясы болып жоспарланған екен. Университет жастары үшін жасалып жатқан игілігі мол істе біздің университет түлектерінің де үлестері бар.
Оның айқын дәлелі - «Жастар» аллеясындағы «Жас жұбайлар», су бұрқақтарындағы «Бекіре балық» және «Сазандар» мүсіндер композициясының авторы Бейбіт Өтегенұлы Меңдіғалиев университетіміздің «Гуманитарлық ғылымдар және өнер» факультеті, «Бейнелеу өнері және дизайн» кафедрасы түлегінің туындылары.
Қазіргі таңда Бейбіт Өтегенұлы - Атырау қаласындағы саябақта бейнеленетін мүсін түрі бойынша танымал мүсіншілердің бірі. Оның «Бекіре» атты композициясы алғаш рет 2011 жылдың қазан айында Атырау қалалық әкімшілігі мен Атырау облыстық Мәдениет басқармасы ұйымдастырған қалалық мүсіншілер симпозиумында дипломант атанып, маңғыстаулық ұлутастан жасалған мүсін Атырау халықаралық әуежайы аллеясына орнатылған болатын. Кейін, 2014 жылы, Атырау қалалық әкімшілігінің ұсынысы бойынша «Бекіре балықтар» саябақтық мүсін композициясы Атырау қалалық әкімшілік үйінің алдына орнатылды. Университетіміздің түлегі, талантты мүсінші Б.Ө.Меңдіғалиевке университет және факультет ұжымы атынан зор денсаулық, шығармашылық шабыт тілейміз!
ПІКІРЛЕР