Тестілеудің үшінші күні
Х.Досмұхамедов атындағы Атырау мемлекеттік университетінде Ұлттық бірыңғай тестілеу жалғасуда.
ҰБТ кестесіне сәйкес бүгін 234 адам тест тапсырып шықты.
ҰБТ өткізілетін әрбір аудитория медициналық-санитарлық нормаларға сәйкес жасақталды. Тест тапсырушылар дезинфекциялаудың 5 кезеңінен өтті. Атап айтар болсақ, дезинфекциялық тоннельден өту, арнайы дезинфекцияланған кілемшеде аяқ киімдерді зарарсыздандыру, дене қызуын өлшеу, қолды зарарсыздандыру сұйықтығымен өңдеу, медициналық маскалар беру.
Тестіленушілер арасындағы арақашықтықтың кемінде 2 метр болуы қамтамасыз етілді. Әрбір аудитория кезең-кезеңмен желдетіліп, өңделіп, аудиториялар тек 35%-ға дейін толтырылды.
Талапкерлер Ұлттық бірыңғай тестілеу туралы өз ойларын жеткізді.
Кеңес Одағының Батыры Сабыр Рақымов атындағы Шымкент «Жас ұлан» республикалық мектебінің 2020 жылғы түлегі Сапарбайұлы Алдияр:
- 2020 жылғы Ұлттық бірыңғай тестілеу қиын болмады. Себебі, тест тапсыру барысында көптеген жеңілдіктер болып, көмектесті. Сол себепті, өзімнің жоғары деңгейде тапсырып, балл жинайтыныма сенімдімін.
№6 Мұрат Мөңкеұлы атындағы орта мектептің 2020 жылғы түлегі Аққалиева Маркизат:
- Мен үшін бүгінгі тестілеу ойдағыдай өтті. Тест белгілеу кезінде жыл бойы оқып, дайындалған сұрақтарым кездесті. Және де осы жылы тест тапсырушыларға көптеген жеңілдіктер болып, аудиториялар да барлық жағдай жасалған. Менің таңдау пәнім физика-математика. Бұл пәндерден кездескен сұрақтардың барлығы мұғалімдерімізбен бірлесе отырып қарастырылған сұрақтар болды.
Айта кетейік, ата-аналар үшін онлайн-көрсетілім ұйымдастырылды.
ПІКІРЛЕР