Алау эстафетасын қабылдап алу салтанатты шарасы
Ағымдағы жылдың 27 –ші қаңтары күні Халел Досмұхамедов атындағы Атырау мемлекеттік университетінің спорт кешенінде 2017 жылғы Алматы қаласындағы 28-ші Дүниежүзілік қысқы универсиаданың Алау эстафетасын қабылдап алу салтанатты шарасы болып өтті.
Республикалық маңызы бар салтанатты шара облысымызға танымал тұлғалар ішінен таңдалынып алынған 60 адамнан құралған топ Атырау облысында тұтанған алауды қала көшелерімен алып жүгіруінен басталған болатын. Бұл танымал 60 адамнан құралған топ ішінде біздің университетімізден Х.Досмұхамедов атындағы Атырау мемлекеттік университетінің ректоры, химия ғылымдарының докторы, профессор Абзал Талтенов, дене тәрбиесі кафедрасының аға оқытушысы Сансызбай Жұбанов және өнер және спорт факультетінің аға оқытушысы Роза Қанатбаевалар болды. Атырау қаласы көшелерімен Алау эстафетасын алып жүгірген топ Халел Досмұхамедов атындағы Атырау мемлекеттік университетінің спорт кешеніне келіп жетті. Атырау университетінің спорт кешеніне алауды Риода өткен XV Параолимпияда ойындарына қатысушы, елімізде тұңғыш өткен ҚР чемпионатының жеңімпазы, Х.Досмұхамедов атындағы Атырау мемлекеттік университетінің өнер және спорт факультетінің денешынықтыру және бастапқы әскери дайындық кафедрасынын 2 - курс студенті Сариев Ануар алып кіріп Атырау университетінің ректоры, химия ғылымдарының докторы, профессор Абзал Талтеновке табыстады. Одан соң 2017 жылғы Алматы қаласындағы 28-ші Дүниежүзілік қысқы универсиаданың Алау эстафетасын университет ректоры салтанатты түрде Атырау облысының әкімі Нұрлан Ноғаевқа табыс етті. Өз кезегінде Атырау облысының әкімі Нұрлан Ноғаев салтанатты шараға жиналған көпшілікке құттықтау сөз сөйледі. Облыс әкімі өз сөзінде «28-ші Дүниежүзілік қысқы универсиаданың алауы Алматы қаласына жеткізіліп, 29 қаңтар күні еліміздің барлық өңірлердің Алауы шоғырланғаннан соң Универсиаданың ашылу салтанаты өтеді. Атырау алауының жолы болсын. 28-ші қысқы универсиядаға сәттілік тілейміз!» - деп ақ тілегін айтып, Алау эстафетасын универсиада астанасы – Алматыға жеткізу үшін атыраулық боксшы, Азия чемпионатының қола жүлдегері, еліміздің төрт дүркін чемпионы, халықаралық жарыстардың жеңімпазы, Х.Досмұхамедов атындағы Атырау мемлекеттік университетінің денешынықтыру және спорт мамандығының 2-ші курс студенті Назым Ищановаға салтанатты табыс етті. Атырау университетінің студенті Назым Ищанова Алау эстафетасын Атырау облысынан Алматыға алып бара жатқан жалғыз өкіл болып табылады.
ПІКІРЛЕР