Теологтармен өткен танымды кездесу

Бүгінгі қоғамда дәстүрлі және діни жат ағымдардың ара-жігін ажырат білудің маңызы аса жоғары. Діни сауаты болмаған адам адасуы әбден мүмкін. Сондықтан теологтар дәстүрлі дін мен жат ағымдардың ара жігін ажырата білудің қажетттілігі жайында жастар арасында танымдық дәрістер мен кездесулерді өткізіп отырады.

Осы мақсатта 20 ақпанда Х.Досмұхамедов атындағы Атырау мемлекеттік университетінің студенттері Атырау облыстық «Шапағат» орталығынан келген дінтанушы мамандармен кездесті.

Кездесуге арнайы келген мамандар қатарында Төлепов Азамат Нұғыманұлы және Катип Мейрамбекқызы болды. Сонымен қатар, Сириядан «Жусан» операциясымен оралған Юсупова Нұржамал Хасанқызы келіп, студенттерге өзінің басынан өткен азапты күндерімен бөлісіп, жастардың басқа жолға түсіп, кез-келгеннің артынан еріп кетпеуі керек екендігін түсіндірді.

Кездесуге Инновациялық білім беру факультетінің студенттері мен профессор-оқытушылары қатысты.

Бұл жиынның мақсаты – студенттердің діни сауаттылығын арттыру, теріс діни ағымдардың жетегінде кетуден сақтануды, сонымен қатар ислам діні мен дәстүрдің тығыз байланысты екендігін ұғындыру. Және де жастарға еліміздің дінге қатысты ұстанымдарын түсіндіру мен оларды түрлі зиянды ағымдардан сақтануға шақыруды көздейді.

Кездесу барысында дін басқармасынан келген арнайы теолог маман Азамат Нұғыманұлы:

            -Діни сауаттылық, мәдениетке баулу бала кезден басталуы керек. Қазіргі таңда елімізде жастардың дінге бет бұруы қарқынды жүруде. Алайда мемлекетіміз зайырлы екендігін есте сақтауымыз керек. Қоғамда діни секталар мен әр түрлі ағымдардың да белең алып тұрғаны белгілі. Осы орайда жастарымыздың алдау мен арбауға түсіп қалмасы үшін, діни сауаттарын арттыру бағытында осындай шаралар өткізіліп тұруы тиіс,- деп сөзін аяқтады.

Кездесу соңында студенттер сұрақтарына жауап алып, дінге қатысты білімдерін толықтырды.

Айта кетейік, алдағы уақытта әр аптаның сейсенбі күні 15:00 мен 17:00 арасында арнайы теолог мамандар келіп, студент жастардың осы бағытта кез-келген сауалдарына жауап беріп, кеңес беріп отыратын болады.

Медиаорталық тілшісі Назерке Жаңбырбай

Тізімге қайта оралу