Шыңғыс Мұқан: Ұлттың әр перзентін дамыту арқылы ұлтты дамытқым келеді
Бүгін Х.Досмұхамедов атындағы Атырау мемлекеттік университетінде қара шаңырағымыздың 70 жылдығына орай «70 жылдыққа -70 тұлғамен кездесу» жобасы аясында "Мазмұндама" қорының төрағасы, Лидерлік даму орталығының негізін қалаушы, Гарвард университетінің түлегі, "Көшбасшылық" атты жинақтың авторы, журналист Шыңғыс Мұқанмен кездесу өтті.
Жиынға Х.Досмұхамедов атындағы Атырау мемлекеттік университетінің ректоры Идрисов Саламат Нұрмұханұлы және әлеуметтік мәселелер және жастар саясаты жөніндегі проректоры Қойшығұлова Ләйлә Ерболатқызы қатысты. Кездесу барысында сөз алған, Лидерлік даму орталығының ұйымдастырушысы Шыңғыс Мұқан: "Лидер - бір адам емес, кез келген адам. Лидерлік адам бойына туа бітетін қасиет емес. Әрбір адам үйрене алатын дағды",- деп студенттерді ең бірінші лидер болып, алға қарай дамуға шақырып, лидер болу кез-келген адамның қолынан келетінін түсіндірді. Жиын барысында университет қызметкерлері мен студенттері өздерін қызықтыратын сұрақтарын қойып, өз ойларын білдірді. Студенттердің басым көпшілігін қызықтырған Гарвард университеті туралы Шыңғыс Мұқан: -«Американың басқару жүйесі біздікінен өзгеше. Speechwriting деген сабақ болды. Яғни ел алдында сөйлейтін сөзді қалай жазу керегін үйретеді. Барак Обаманың спичрайтерінен сабақ алдым. Бізде мемлекеттік қызметкерлердің халық алдындағы сөзі есеп беру мен баяндама ғана. Ал қағазға жазылған сөзде мотивация болуы керек.»,- деп сөзін аяқтады. Жиын соңында Шыңғыс Мұқанға университет атынан арнайы сыйлық табысталып, студенттер естелік суретке түсті.
ПІКІРЛЕР