Еріктілер жылының салтанатты ашылуы өтті
Х.Досмұхамедов атындағы Атырау мемлекеттік университетінің мәдени-спорттық кешенінде еріктілер жылының салтанатты ашылуы өтті.
Шараға университетіміздің ректоры С.Идрисов, Атырау облысы Жастар саясаты мәселелері басқармасының басшысы Р.Құспан, «Қазақстан-Атырау» телеарнасының директоры Қ.Әуесбай және өңіріміздегі барша еріктілер мен студенттер қатысты. 2020 жыл «Еріктілер жылы» деп жариялаған Мемлекет басшысы Қасым-Жомарт Тоқаев өз Жолдауында азаматтық қоғамды нығайтуда еріктілердің орны ерекше екенін атап өткен болатын. Университет студенттерінің басым көпшілігі қоғамдық жұмыстарға араласады. Бүгінгі бастама сол жастарды игілікті шараға көптеп тарту мақсатында ұйымдастырылып отыр. С.Идрисов, Х.Досмұхамедов атындағы Атырау мемлекеттік университетінің ректоры: Ерікті деген бұл - әрбір жастың, әрбір азаматтың өзінің жеке жан қалауымен осы қоғамға кішкене болса да қосатын үлесі. Бұл – жастардың бойында азаматтық позицияны, патриоттық сезімді оятатын бағыттардың бірі. Ерікті болу арқылы біз жастарды осы қоғамға бейімдеп, келешекте өзінің отанына, қоғамдағы әлеуметтік жағдайларға бей-жай қарамай оған өзіндік үлесін қосуға шақыратын бірден-бір платформа деп айтсақ болады, -деп өңірде ерікті жастардың қатысуымен атқарылған істерді атап өтіп, бірқатар еріктілерді алғыс хатпен марапаттады. Роллан Құспан, Атырау облысы Жастар саясаты мәселелері басқармасының басшысы: - Ерікті дегеніміз не? Ол – қоғамға көмек беру. Ең бірінші – өзіне көмек беру. Бізде көбінесе еріктілерде жастар буыны өте көп. 80-90 пайызы жастар. Солар біреуге қол ұшын беру, көмектесуді әр түрлі форматта өткізіп жүр. Атырау облысында білім алып жатқан студенттердің 30 проценті –еріктілер тобына кіргендер. Биыл өңірде белсенді жастардың қатысуымен түрлі жобалар, қайырымдылық іс-шаралары өтті, -деп еріктілердің қоғамға тигізер үлесіне баса назар аударды.
ПІКІРЛЕР