Андре Карстенс университетімізде
Бүгін Х.Досмұхамедов атындағы Атырау мемлекеттік университетінде Қазақстандағы Нидерланды мемлекетінің елшілігінен келген Андре Карстенспен кездесу өтті.
Жиынға университетіміздің профессор-оқытушылар құрамы және магистранттар мен студенттер қатысты. Кездесу барысында қатысушылар сұрақтарына жауап алып, ұсыныстарын білдірді.
Университетіміздің ректоры Идрисов Саламат Нұрмұханұлы жиын басында елшіліктен келген Андре Карстенсқа алғысын білдіріп, алда бірігіп жұмыстар атқаратындықтарын жеткізді.
Айта кетейік, 2017 жылы университетте «Capstone project» жобасы жүргізілді. Аталған жобаның демеушісі – Нидерланды Королдігі, ал оны Қазақстандағы ұйымдастырушысы – Қазақстандағы Нидерланды мемлекетінің елшілігі. Жобаны жүзеге асырушы – Орта Азиядағы Penal Reform International (Халықаралық түрме реформасы) ұйымы.Қазақстандағы адам құқықтары мен қылмыстық сот өндірісі тақырыбындағы «Capstone project» жобасы – ғылыми зерттеу жұмыстарын жүргізу аясында студенттердің өз білімдері мен қабілеттерін шыңдайтын, дамытатын және жетілдіретін халықаралық деңгейдегі жоба болып табылады. Жобаға қатысуға құқықтану және журналистика мамандықтарынан 87 студент ниет білдірді. Жоба шартына сай іріктеуден 45 студент өтті (құқықтану – 41 студент, журналистика – 4 студент). Ғылыми жұмыстарға Құқықтану кафедрасының ПОҚ жетекшілік етті: Турдалиев Қ.О., Шаяхметова Ж.Б., Идресова Ү.Х., Ердешова Ж.И., Тажгарина Б.Қ., Куккузова Э.И.
Адам құқықтарын қорғау, діни сенім құқықтары, сотталғандарды әлеуметтендіру және пробация мәселесі бойынша студенттер сауалнама құрып, әлеуметтік желі арқылы және университеттің оқытушылары мен студенттері арасында қоғамдық сауалнама жүргізді. Қазақстандық және шетелдік ғалымдардың ғылыми еңбектерімен, сондай-ақ отандық, шетелдік және халықаралық нормативтік құжаттармен танысып, саралады. Облыстағы құқық қорғау органдарымен, адам құқықтарын қорғау саласындағы қоғамдық ұйымдармен, білім беру, денсаулық және т.б. әлеуметтік салалар мамандарымен бірлесе жұмыстар атқарды. Нидерланды университеттерінен келген профессорлар Мария Феодорова, Дэвид Кин, Антон Ван Калмтуттың дәрістеріне қатынасты. Нидерланды университеттері профессорлары мамандықтың профессор-оқытушыларына, студенттеріне адам құқықтарының халықаралық-құқықтық қорғалуы мәселелері, халықаралық басылымдарға ғылыми жұмыстарды жариялау жөнінде пікір алмасты. Шетелдік ғалымдар да қазақстандық құқық жүйесіндегі адам құқықтары және оны қорғау тетіктері мен деңгейі, қылмыстық сөт өндірісі, қылмыстық атқару мәселелері туралы қызығушылықтарын білдірді. Бұл жоба Құқықтану мамандығы студенттері үшін халықаралық деңгейдегі алғашқы ғылыми жоба болды. Осындай жобалардың мамандық үшін де, университет үшін де маңыздылығы зор. Білім беру ісін ғылыми-зерттеушілікпен ұштастыру заман талабы. Студенттердің тақырып аясында зерттеу, зерделеу, тұжырымды пікір айтып, прогрессивті ойлай алатын тұлға болып қалыптасуына және олардың танымдылық белсенділігі мен шығармашылық қабілеттерінің қалыптасуына, шыңдалуына міне осындай жоғары деңгейдегі Ғылыми жобалар өз септігін тигізеді. Студенттердің топтаса бірігіп жұмыс атқаруы жауапкершілік, адамгершілік және мәдениеттілікті талап ететін жұмыс. Біздің студенттеріміз осы қасиеттердің бәрін бойларына дарытқан дарынды студенттер екендігін дәлелдеді.
Жобаның қорытындысы бойынша: 1-орын: «Veritas!» командасы - А.Сулейменова, Т.Қанат, Ф.Карапиденов. Тақырыбы: «Регулирование религиозной атрибутики в Казахстане» (жетекшілер: Ж.И.Ердешова және Ү.Х.Идресова). Нидерланды мемлекетіне оқу-танысу жолдамасын жеңіп алды.
2-орын: Н.Колузанова, Э.Булекбаев, А.Тукпатова. Тақырыбы: «Право осужденных на личную безопасности»(жетекшілер: Ж.И.Ердешова және Ү.Х.Идресова). Ағылшын тілін үйрену курсына жолдама ұтып алған болатын.
Жобаның соңында 2018 жылдың 17-22 маусым аралығында Халықаралық түрме реформасы ғылыми жобасының жеңімпаздары құқықтану мамандығының 4-курс студенттері А.Сулейменова, Т.Қанат, журналистика мамандығының 3-курс студенті Ф.Қарапиденов, жетекшілер Ж.Ердешова және Ү.Х.Идресова Нидерланды мемлекетіне адам құқықтарын қорғаудың голландиялық үлгісімен танысу мақсатында оқу іс сапарына барды.
ПІКІРЛЕР