«Қазақстанның аграрлық тарихының мәселелері: дәстүр, тәжірибе, әдіснама»

Бүгін Х.Досмұхамедов атындағы Атырау мемлекеттік университетінде «Рухани жаңғыру» бағдарламасы аясында белгілі тарихшы, тарих ғылымдарының докторы, профессор Алдар Сарсенұлы Сарсеновтың 70 жас мерейтойына орай «Қазақстанның аграрлық тарихының мәселелері: дәстүр, тәжірибе, әдіснама» атты халықаралық ғылыми-практикалық конференция өтті.

Конференцияға шетелдік және отандық тарих ғылымында экономикалық тарихтың және аграрлық саясаттың өзекті мәселелерін зерделеп жүрген ғалымдар, қоғам қайраткерлері мен білім саласының өкілдері (жоғары, орта кәсіптік, орта мектеп мұғалімдері, магистранттар) қатысты. Конференция Каспий өңірі мемлекеттерінің жоғары оқу орындары ғалымдарының қатысуымен халықаралық деңгейде өткізілді.

Пленарлық мәжілістің модераторы т.ғ.д., қауымдастырылған профессор Бердіғожин Лесқали Базарғалиұлы болды.

Х.Досмұхамедов атындағы Атырау мемлекеттік университетінің ғылым жөніндегі проректоры Саламат Нұрмұханұлы Идрисов:

-          Алдар Сәрсенұлының тек университетіміздің ғана емес, сондай-ақ, Атырау өңірінде тарих ғылымының дамуына, кәсіби шыңдалған тарихшы мамандарды дайындауға қосқан үлесі шексіз. Атыраудан шыққан тарихшы ғалымдар баршылық. Дей тұрғанмен, дәл Алдар Сәрсеновтей тарих мектебін қалыптастырғаны саусақпен санарлықтай,- деп конференцияны ашып берді.

Аталмыш шарада Кеңестік дәуірдегі аграрлық саясат: тарихи тәжірибе, зерттелуі, Қазақстандағы аграрлық саясаттың тарихы және ерекшеліктері, XX ғасырдағы Қазақстанның әлеуметтік-экономикалық дамуы мен Тәуелсіздік жылдарындағы экономикалық даму және аграрлық саясат мәселелері туралы баяндалды.

Айта кетейік, Қ.Жұбанов атындағы Ақтөбе өңірлік мемлекеттік университетінің профессоры, т.ғ.д. Абдоллаев Нұртаза Акишанұлы Кеңестік биліктің Қазақстандағы аграрлық саясатының кейбір өзекті мәселелерін баяндаса, Нұр-Сұлтан қаласынан арнайы келген Astana IT University профессоры, т.ғ.к. Искалиев Самат Амангелдіұлы Қазақ интеллегенциясының көшпенділердің отырықшылыққа өту мәселесіне көзқарасын тілге тиек етті.

Әл-Фараби атындағы Қазақ ұлттық университетінен келген т.ғ.к. Ноянов Еділ Ноянұлы Қазақстан Республикасында астық өндірудің жетістіктері мен перспективалары жөнінде сөз қозғады.

Сонымен қатар, Қ.Жұбанов атындағы Ақтөбе өңірлік мемлекеттік университетінің профессоры, т.ғ.д. Исмагулов Ұзақбай Шаукерұлы Отан тарихыен зерделеудің кейбір теориялық-методологиялық мәселелеріне тоқталса, Қазақстандағы аграрлық қатынастар тарихы:зерттелуі және мәселелері тақырыбында «Сарайшық» тарихи-мәдени музей-қорығы директоры, т.ғ.д. профессор Мұқтар Әбілсейіт Қапизұлы ашып айтты.

Қазақстан және Шанхай Ынтымақтастық Ұйымы: экономикалық интеграция мәселелері тақырыбында Атырау өңірінің тарихы, этнографиясы мен археологиясы ғылыми-зерттеу орталығының директоры Сапанов Сайфулла Жұмабайұлы баяндады.

Жиын соңы мерейтой иесіне арналған құттықтауларға ұласты.

 

 

ПІКІРЛЕР

Тізімге қайта оралу

Құттықтаймыз!

17 Май 2022 37