«Қазіргі Қазақстан. Елбасының көшбасшылық сабақтары» ашық дәрістері басталды
1 желтоқсан - Қазақстан Республикасының Тұңғыш Президент күніне орай еліміздің барлық білім беру ұйымдарында жалпы республикалық ашық сабақтар өткізу жоспарланған болатын. Осыған орай, бүгін университетімізде еліміздің мемлекет және қоғам қайраткері, ҚР Парламенті Сенатының депутаты, университетіміздің түлегі Еңсегенов Сәрсенбай Құрманұлының «Қазіргі Қазақстан. Елбасының көшбасшылық сабақтары» атты ашық дәрісі өтті.
Аталмыш шараның мақсаты – ҚР Тұңғыш Президенті Н.Ә.Назарбаевтың қызметі туралы студенттердің білімін кеңейту, жастардың қалыптасуы мен дамуындағы Н.Ә.Назарбаевтың рөлі жайлы студенттердің көзқарастарын қалыптастыру, Қазақстан жастарының рухани-адамгершілік құндылықтарын дамытумен қатар, Елбасы Нұрсұлтан Назарбаевтың ерен еңбегін жас ұрпақ санасына сіңіру мен ұлығылау, насихаттау болып табылады.
Жиынды Х.Досмұхамедов атындағы Атырау мемлекеттік университетінің ғылым жөніндегі проректоры С.Н.Идрисов ашып, қазақстандық патриотизмді, ұлттық сананы қалыптастыру, тәуелсіз мемлекет – Қазақстан Республикасының қалыптасуы мен дамуындағы Ұлт Көшбасшысы рөлінің маңызын түсіндіре кетті.
Содан соң, ҚР Парламенті Сенатының депутаты Сәрсенбай Құрманұлы Тұңғыш Президент – Елбасы Н.Ә.Назарбаевтың қазақстандық мемлекеттіліктің қалыптасуындағы рөлі туралы баяндама жасады. Ол өз баяндамасында:
- Қазақстан Республикасының Тұңғыш Президенті – Елбасы Н.Ә.Назарбаевтың «Болашаққа бағдар: қоғамдық сананы жаңғырту» соңғы бағдарламалық мақалаларының бірі, оның басты түйіні – әрбір қазақстандық бәсекеліктің қатал күресінде әрдайым ілгері ұмтылу, көшбасшылық қасиетті дамыту, өзін-өзі жетілдіріп отыру қажеттігінде болып табылады.
Қазіргі заманның білім беру жүйесі өмір сүру деңгейі жоғары, азаматтық-құқықты және кәсіби мәдениетті қазақстандық қоғамның – тұрақты және қарқынды дамуын сақтауда басты рөл атқаруы тиіс. Білім берудің әлеуетін қоғамды біріктіру, елдің бірыңғай әлеуметтік-мәдени кеңістігін, ұлттық мәдениеттердің және түрлі конфессиялардың тең құқықтарын сақтау үшін қолдану қажет, - деді.
Шараға университетіміздің профессор-оқытушылар құрамы мен студенттер қатысып, дәріс соңында студенттеріміз Сәрсенбай Құрманұлына сауалдар қойып, патриоттық өлеңдер оқыды.
ПІКІРЛЕР