"Әбіш Кекілбаев– замана заңғары, сөз зергері"
Заңғар жазушы, сөз зергері, қоғам және мемлекет қайраткері Әбіш Кекілбаевтың 80 жылдығы республика көлемінде атап өтілуде.
Әбіш Кекілбайұлы- Халық жазушысы, Қазақстан Республикасының Мемлекеттік сыйлығының, Қазақстан Республикасы Президентінің Бейбітшілік және рухани келісім сыйлығының, "Тарлан" сыйлығының иегері, ҚР Ұлттық Ғылыми академиясының академигі, Маңғыстау, Атырау облыстарының Құрметті азаматы, "Құрмет белгісі", "Қазақста нның Тұңғыш Президенті Нұрсұлтан Назарбаев", "Отан" ордендерінің кавалері, "Қазақстанның Еңбек Ері" атақтары мен өзге де марапаттарға ие болғаны белгілі.Бүгін Атырауда «Әбіш Кекілбаев – замана заңғары, сөз зергері» атты республикалық ғылыми-практикалық конференциясы өтті. Аталмыш шараны Халел Досмұхамедов атындағы Атырау мемлекеттік университетімен бірлесіп Атырау облысы Әкімдігі, Атырау облысы Мәдениет, мұрағаттар және құжаттама басқармасы «Рухани жаңғыру» бағдарламасы аясында көрнекті жазушы және қоғам қайраткері, Қазақстанның халық жазушысы, Халық Қаһарманы, мемлекеттік сыйлықтың иегері Әбіш Кекілбаевтың туғанына 80 жыл толуына орай ұйымдастырып отыр.
Жиынды ашып берген Атырау облысының әкімінің орынбасары Қарағаев Жұмабай Ғаббасұлы «Әбіш әлеміне тереңдеп бойлау бүгінгі ұрпақтың басты парызы деп білеміз. Оның әр жазған шығармасы мен ұрпақ санасын жаңғыртудағы еңбектері елеусіз қалмауы керек. Сондықтан, бүгіннен бастап Әбішті бұқараға таныту сіз бен біздің еншімізде» деп қатысушыларға алғысын жеткізді.
Модератор - қаламгер-журналист, Қазақстанның еңбек сіңірген мәдениет қызметкері, ҚР Президенті сыйлығының лауреаты, Қазақстан Жазушылар Одағы Басқарма төрағасының орынбасары Құлкенов Мереке Әбдешұлы.
Республикалық конференцияға қазақ әдебиетінің өзекті мәселелерін зерделеп жүрген ғалымдар, тіл жанашырлары, қоғам қайраткерлері мен білім саласының өкілдері қатысты. Олардың қатарында Ә.Кекілбаевтың жұбайы Жұмабаева Клара Қалекенқызы, жазушы, драматург, ҚР Мемлекеттік сыйлығының лауреаты, Қазақстанның еңбек сіңірген қайраткері Сарай Әнес Төлендіұлы, ф.ғ.д., әл-Фараби атындағы Қазақ Ұлттық университетінің профессоры, Қазақстан Республикасы Ұлттық ғылым академиясының академигі Дәдебаев Жанғара, Венгриядағы қазақтар диаспорасының Төрайымы Мандоки Оңайша Мақсымқызы, ҚР Еңбек сіңірген заңгері, «Құрмет» орденінің иегері Елекеев Ирак Қасымұлы, жазушы, ҚР Мемлекеттік сыйлығының лауреаты Қажығали Мұханбетқалиұлы, ф.ғ.д, әл-Фараби атындағы Қазақ Ұлттық университетінің профессоры Бисенғали Зинол-Ғабден Қабиұлы, ф.ғ.д., «Арыс» баспасының директоры Әнес Ғариполла, ғылым докторы, профессор, Ә.Кекілбаевтың әдеби мұрасын зерттеу орталығының директоры Қадыр Өтегенов Жүсіп, ақын, «Дарын» Мемлекеттік жастар сыйлығының лауреаты Светқали Нұржан, ғылым докторы, профессор Умиткан Дауренбекқызы Муналбаева, Қазақстан Республикасы Жастар одағы сыйлығының, Төлеген Айбергенов атындағы және Халықаралық "Алаш" әдеби сыйлықтарының лауреаты Гүлнар Салықбай, ақын, Қазақстан Жазушылар Одағы мүшесі Маржан Аманқосқы Ершуова, "Dosmedia" шығармашылық бірлестігінің жетекшісі Ұшқын Сәйдірахман және т.б.зиялы қауым өкілдері бар.
ПІКІРЛЕР