Фариза апталығы басталды

Биыл қазақ поэзиясының падишасы, мемлекет және қоғам қайраткері, журналист қазақтың ақын қызы - Фариза Оңғарсынованың туғанына - 80 жыл.
Осыған орай, бүгін Х.Досмұхамедов атындағы Атырау мемлекеттік университетінде «Болашаққа бағдар: рухани жаңғыру» бағдарламасы аясында көрнекті ақын және қоғам қайраткері, Қазақстанның Халық Жазушысы, Мемлекеттік сыйлықтың иегері Фариза Оңғарсынованың туғанына 80 жыл толуына орай «Фариза Оңғарсынова – көрнекті ақын, қоғам және мемлекет қайраткері» атты республикалық ғылыми-практикалық конференциясы өтті.

Аталмыш шараға келген құрметті қонақтарды университет студенттері Халел ескерткіші алаңында ақынның өлеңдерін оқып, жырдан шашу шашып қарсы алды.

Конференция шымылдығы «Ар мен Ақын» атты деректі фильммен ашылды. Фильмде ақынның Нарынның наршөккен шағылдарында қалған мұңлы балалық суреттері, алғашқы махаббат пен адал жүректің айнымас серті, алаш жырының айбыны, жан сыры, арзу-арманы, тылсым құпиясы мен асқақ болмысы, ар алдында ақынның өзі ақтарылған бейнесі көрсетілген.

Фильмнен соң, Фариза ақынның «Жыр – менің жалғыз тарланым» атты аудиоөлеңдер жинағының тұсауы кесілді. Тұсаукесер рәсімін жасау жазушы, драматург, Қазақстанның еңбек сіңірген қайраткері Әнес Сарай мен Х.Досмұхамедов атындағы Атырау мемлекеттік университетінің филология ғылымдарының докторы, ақын, профессор Қадыр Жүсіпке бұйырды. Мұнда ақынның өз даусымен және еліміздің танымал өнер тарландарының ақынның шығармашылыған оқыған өлеңдері жарық көрген.

Республикалық деңгейде өткізілген конференцияға Светқали Нұржанов, Ақұштап Бақтыгереева, Мереке Құлкенов, Ұлықбек Есдаулетов, Әнес Сарай сынды қазақ әдебиетінің өзекті мәселелерін зерделеп жүрген ғалымдар, тіл жанашырлары, қоғам қайраткерлері мен білім саласының өкілдері қатысты.

         Пленарлық мәжілістің мақсаты – поэзия падишасы атанған Фариза Оңғарсынова әлемін жан-жақты зерттеу, шығармаларындағы қоғамдық, әлеуметтік, педагогикалық, психологиялық, философиялық және ғылыми көзқарастарын ашып көрсету, талдау, халыққа жаңа қырынан таныту болатын.

Шара соңы естелік суретке түсумен аяқталды.

 

ПІКІРЛЕР

Тізімге қайта оралу

Тарихқа тағзым

17 Сен 2021 27