Журналистерге арналған дөңгелек үстел өтті
Кеше Х.Досмұхамедов атындағы Атырау мемлекеттік университетінде 28 маусым – «Байланыс және ақпарат қызметкерлері күніне» арналған дөңгелек үстел өтті. Оған жергілікті және республикалық БАҚ өкілдері қатысты.
Жиын барысында Әлеуметтік мәселелер және жастар саясаты жөніндегі проректор Қойшығұлова Ләйлә Ерболатқызы журналистерді университетіміздің медиа саясатымен таныстырып, бірлескен іс-шаралар жоспарланды. Сондай-ақ, Ләйла Ерболатқызы Атырау облысындағы білім мен ғылымның қара шаңырағы Х.Досмұхамедов атындағы Атырау мемлекеттік университетінің тыныс-тіршілігіне арналған мазмұнды мақалалар, ғалымдардың қоғамдағы маңызды мәселелер жөніндегі пікірлері БАҚ беттерінде ұдайы жарияланып отырғанын айта кетті. 2019 жылдың басынан бастап маусым айына дейінгі есеп бойынша облыстық «Атырау» газетіне 19, «Прикаспийская коммуна» газетіне 4, республикалық «Айқын» газетіне 2 мақала жарияланса, университетте өткізілген шаралар «Қазақстан-Атырау» телеарнасынан 23 рет көрсетілді.Осыған орай, аталмыш жиында жыл басынан бері университетімізде өткен барлық шараларға ақпараттық қолдау білдіріп, газет, телеарналарға жариялаған журналистер алғыс хатпен марапатталды. Университеттің журналистика кафедрасының меңгерушісі, қауымдастырылған профессор Мәншүк Тынышқалиқызы жергілікті БАҚ-пен Х.Досмұхамедов атындағы Атырау мемлекеттік университетімен бірлескен жобалар туралы сөз қозғады. Соңғы екі жыл ішінде «Журналистика» кафедрасының республика бойынша жеткен жетістіктерін баяндап, телеарна ішінен ашылып жатқан медиа аудиторияның болашақ тележурналистер дайындаудағы маңызын айта кетті. Республикалық «Қазақстан» ұлттық телеарнасының меншікті тілшісі Өнербек Жаңабаев өз тарапынан журналистика мамандарын дайындау ісінде әрқашан кәсіби қолдау көрсетуге дайын екенін, оқу жылынан бастап студенттерге айына екі рет шеберлік сағатын өткізуге келісім берді. Бұл жас журналистерге телеарнаның кәсіби мамандарынан білімдерін жетілдіріп қана қоймай, кәсіби өсуге қадам басады деп сенеміз. Келген қонақтар ризашылықтарын білдіріп, болашақта да университетпен тығыз байланыста жұмыс атқарамыз деп тарқасты.
ПІКІРЛЕР