«Халел оқулары» аясында дәстүрлі ғылыми-педагогикалық апталық өтті
Х.Досмұхамедов атындағы Атырау мемлекеттік университетінің, Инновациялық білім беру факультетінің, «Педагогика» кафедра-лабораториясының ұйымдастыруымен 24 – 30 сәуір аралығында «Халел оқулары» аясында дәстүрлі ғылыми-педагогикалық апталық өтті.
Декаданың алғашқы күнінде Алаш қозғалысының қайраткері, дәрігер, ұстаз, ғалым Халел Досмұхамедовтың туғанына 136 жыл толуына орай университет алдындағы ғалымның ескерткішіне гүл шоғыры қойылды. «Педагогика» кафедра-лабораториясының доценті, п.ғ.к. Ғ.Б.Базарғалиев «Алаш зиялылары: тағылым, жаңаша көзқарас» тақырыбында ашық дәріс оқыды.
25 сәуірде х.ғ.к., профессор Р.Қ.Қаражігітова, доцент Г.Т.Құрманғазиева, п.ғ.к., қауымдастырылған профессор Д.Р.Муталиевалардың ұйымдастыруымен 1 курс студенттерінің арасында «Халелтану» педагогикалық байқауы өткізілді. Студенттер Халел туралы өздерінің дайындаған презентацияларын көрсетіп, ғалымға арнап өлең жолдарын оқыды. Байқау соңында студенттер дипломдармен марапатталып, кітаптар сыйға тартылды.
25 сәуір сағат 14.50 де кафедраның профессоры, п.ғ.к., Н.С.Сарсенова мен доцент А.Р.Сабировтың ұйымдастыруымен «Ұстазға – ұлы құрмет» атты оқу-тәрбиелік семинар болды. Семинар педагогикалық мамандықтардың лектік топтарында оқитын 2 курс студенттерімен өткізілді. Доцент Айдар Рамазанұлы семинардың өту барысымен таныстырды. Семинарда студенттер педагогикалық эсселерін оқыды, Джигсо әдісімен топтық жұмыстар қорғалды және студенттердің дайындаған тәрбиелік шаралары өтті. Семинар соңында кафедраның оқытушы-профессорлары өздерінің пікірлерін білдірді.
26 сәуір сағат 15.50 де кафедра меңгерушісі, п.ғ.д., профессор Ш.И.Джанзакова Елбасының «Болашаққа бағдар: рухани жаңғыру» атты мақаласы аясында жастарға ұлттық тәрбие беру мақсатында лектік залда ашық дәріс өткізді. Дәріске магистранттар мен студенттер қатысы. Дәріс өте жоғары деңгейде болды. Студенттер ұлттық тәрбиеге байланысты пікірлерін білдіріп, белсенді қатысты.
30 сәуір сағат 11.00 де кафедра меңгерушісі, п.ғ.д., профессор Ш.И.Джанзакова, кафедраның профессоры, п.ғ.к. Н.Ғ.Даумов, кафедраның магистрлері Г.М.Тәжіғалиева, А.С.Қожрақовалардың ұйымдастыруымен «Ұлттық тәрбие-ұлы даланың рухани мұрасы ретінде» атты тақырыппен ғылыми-педагогикалық семинар өтті. Семинардың жүру барысымен кафедра меңгерушісі, п.ғ.д., профессор Ш.И.Джанзакова таныстырды. Алғы сөзді университеттің тәрбие ісі жөніндегі проректоры, п.ғ.к., қауымдастырылған профессор Л.Е.Қойшығұлова бастады. Семинарға Атырау облыстық дарынды балаларға арналған ұлттық гимназиясының тәрбие ісі жөніндегі директордың орынбасары Уразгалиева Гүлжанат Жақсығалиқызы, Атырау қаласының №33 Қ.Қайсенов атындағы жалпы орта білім беретін мектебінің тәрбие ісі жөніндегі директордың орынбасары Шайхы Ербол Мұратұлы, №13 Д.Байбосынов атындағы ұлттық гимназияның тарих пәнінің мұғалімі Утеулиев Жұма Тапенұлы қатысып, мектептеріндегі ұлттық тәрбие аясында өткізіліп жатырған шаралармен таныстырды. Сонымен қатар, семинарда п.ғ.д., профессор Ш.И.Джанзакова «Рухани жаңғырудың негізі-ұлттық тәрбие» тақырыбында, п.ғ.к., профессор Н.С.Сәрсенова «Ұлттық құндылық–ұлттың тірегі» тақырыбында, доцент А.Р.Сабиров «ЖОО-дағы педагогикалық пәндеріндегі ұлттық тәрбие беру мәселесі» тақырыбында баяндама жасады. Шет тілі: екі шет тілі мамандығының 1 курс студенттері Д.Бақтығалиева, М.Юнусова, А.Әділетова «Ұлттық мектептегі тәрбие жұмысының жүйесі» тақырыбында жобалық бағдарламасын ұсынды. Семинар соңында келген қонақтарға, баяндама жасаушыларға университет атынан естелік сыйлықтар табысталды.
Білім алушылар үшін өткізілген апталықтың ғылыми, оқу-әдістемелік, тәрбиелік мәні зор болды. Студенттер апталыққа үлкен белсенділікпен, қызығушылықпен қатысып жоғары білімділік деңгей танытты.
ПІКІРЛЕР