«Киелі жерлерге тағзым»
Х.Досмұхамедов атындағы Атырау мемлекеттік университетінің бір топ студенттері шалғай өлке - Маңғыстау жеріне сапар шегіп келді.
Бұл бастама «Болашаққа бағдар: рухани жаңғыру» бағдарламасы және университетіміздің 70 жылдық мерейтойына орай жүзеге асып отыр. Университет ректоры Талтенов Абзал Ахатұлының қолдауымен заманында батыр, абыз, әулие атанған Бекет ата зиратына әр факультеттен құралған 70 студент жастар мен 10 оқытушылар тәу ете барды.
Мешітке жақын маңда 100 км жерде орналасқан Шопан ата және Шопан атаның күйеу баласының мешіт-қорымына да аяқ тіреп, зиярат етті. Мешіт басында зиярат етушілер қарасы қалың. Тіпті, ол жерлерден туристерді де байқауға болады. Бірі - деніне саулық, бірі - жолының ашықтығын, бірі - перзент сұрай барады.
Бекет ата мешіті және арнайы емдік суға бару үшін 2 шақырымдай тау жолынан төменге түсіп, кері көтерілу керек. Мешіттің сол жағында жартастың етегіне алып баратын соқпақ жол жатыр. Сол жерде киелі құдық бар, суымен ауырмас үшін міндетті түрде көзіңді жуу керек. Құдық суы лайлы екен, алайда онымен адамдар жуынып алып жатыр. Сумен жуынудың екі түрлі пайдасы болуы мүмкін.
Көзің ауырмаса – дүниәуи пайда, осы су арқылы жан дүниең ашылса – рухани байлық. Қайтып келе жатып, екінші құдық бар. Бұл жерде арнайы жасалған шүмектерден тәу етушілер су алады. Бұл су алғашқы құдық суына қарағанда мөп-мөлдір және тұз дәмі бар.
Осылай Бекет ата басына бір күн сиынып түнедік те таң ата сала жолға шықтық. Маңғаз Маңғыстау өлкесінің қарт Каспий теңізіне саяхат жасап, қаланы аралап шықтық. Киелі жерге сапарымыз осылайша аяқталып, жүрдек поезбен арайлы Атырауымызға аттандық.
Айсәуле Ардаққызы
Журналистика мамандығының 3 курс студенті
ПІКІРЛЕР