Махамбет атындағы сыйлықтың иегері атанды!
Қазақстан және дүниежүзі тарихы кафедрасының профессоры Аманкелді Шамғонұлын республикалық Махамбет атындағы сыйлықтың лауреаты атануымен шын жүректен құттықтаймыз.
2003 жылы Махамбет батырдың 200 жылдығының ЮНЕСКО көлемінде атап өтілуі тұсында тағайындалған сыйлық биыл 15 жыл үзілістен кейін қайтадан жаңғыртылған болатын. Әріптесіміз Исатай-Махамбет батырлардың жорық жолдарын картада нақтылауға қосқан ғылыми еңбегі, сонымен қатар 2018 жылы жариялаған «Ұлы дала батыры – Тайманның ұлы Исатай» зерттеуі үшін марапатталды.
Республикалық Махамбет атындағы сыйлықты алған елімізге танымал тұлғалар қатарында Қазақстанның Еңбек Ері, Мемлекеттік сыйлықтың иегері, ақын Олжас Сүлейменов, Мемлекет сыйлықтың иегері, жазушы Әнес Сарай, Қазақстан Жазушылар Одағының Басқарма төрағасы, ақын Ұлықбек Есдәулет, опера әншісі Ғафиз Есімов, ақын Ақұштап Бақтыгереева, композитор-дирижер Айтқали Жайымов, жазушы Қажығали Мұхамбетқалиев, режиссер Аманкелді Тәжібаев, Махамбет Өтемісов атындағы Атырау облыстық қазақ драма театрының директоры Берік Жаменов, Қазақстанның еңбек сіңірген әртісі Айгүл Үлкенбаева, ақындар Бақытгүл Бабаш пен Әлия Дәулетбаева және басқалары бар.
Әріптесімізді мерейлі марапатымен шын жүректен құттықтап, болашақ ғылыми зерттеу жұмыстарына шығармашылық шабыт тілейміз.
ПІКІРЛЕР