Jas tarihshylar slety
«Тарих ғылымы: ізденістер мен жетістіктер» тақырыбында 20 қарашада Атырау қаласы мектептерінің жас тарихшы ұстаздарының ізденістер мен жетістіктерін дәріптеген үлкен іс-шара өтті. Атырау өңіріне мектептегі тарих пәнінің мұғалімдерін дайындап отырған бірден-бір оқу орны болып табылатын Х.Досмұхамедов атындағы Атырау мемлекеттік университеті базасында өткен тарихшылар слетіне қала мектептерінен 50-ден аса мұғалім қатысты.
Іс-шараның негізгі мақсаты – студенттер мен оқытушылардың ғылыми шығармашылығын ұйымдастыру және ғылыми-ізденіс жұмыстар жүргізудегі өзекті мәселелерін шешу бойынша тәжірибе алмасу, зерттеулер мен жұмыс нәтижелерін талқылау. Секциялық жұмыстар барысында «тарих сабақтарын жоспарлау мен оқытуда саралау тәсілдерін қолдану» бойынша «Өрлеу» біліктілік арттыру ұлттық орталығы Атырау облысы бойынша тренері Жоламан Ізғали, «Қазақстан тарихы» пәні бойынша сыни ойлау және зерттеу дағдыларын қалыптастыруда тарихи концептілер қолдану ерекшеліктері» тақырыбында Атырау қаласы назарбаев зияткерлік мектебінің тарих пәнінің мұғалімі Ақмарал Төлешова, «Қазақстан тарихын оқытуда өлке тарихын пайдалану» бойынша Қызылқоға ауданы Қаракөл орта мектебінің жоғары санатты мұғалімі Фарида Суатова, «Өлкетану» факультативтік сабағын берудің тиімді жолдары» бойынша Қызылқоға ауданы Мұқыр орта мектебінің тарих пәні мұғалімі, жас маман Серікболсын Беріков таныстырылымдарын ұсынып, тәжірибелерімен бөлісті.
Университеттің ғылыми жұмыстар проректоры Саламат Идрисов «Заманауи ғылым және деректер базасымен жұмыс» тақырыбында баяндама жасап, қазіргі таңдағы ғылыми тақырыптарды өзектендіру, халықаралық деректер базаларымен жұмыс жасау, мұғалімдердің практикалық тәжірибелерін жариялаудың маңызы туралы айтып берді.
«Мәңгілік Ел» ғылыми-зерттеу орталығының директоры Аққали Ахмет «Өлкетану бағытындағы жұмыстарды ұйымдастыру» баяндамасында өлке тарихына қатысты жұмыстарды ұйымдастырудағы жеке тәжірибесін баяндады. Сонымен бірге Санкт-Петербург, Орынбор мемлекеттік мұрағаттарынан алынған Атырау өңіріне қатысты бірегей мұрағаттық фотодеректермен таныстырды.
Факультет деканы Гулфайруз Кайргалиева «Ғылыми зерттеу жұмысын ұйымдастырудың әдістері» тақырыбында баяндап берді.
Өңірлік «Рухани жаңғыру» жобалық кеңсесінің жетекшісі Орынтай Биманова жас тарихшылар бас қосуының мақсатымен, іс-шара барысында айтылған ұсыныстармен таныстырды.
Гуманитарлық білімді қалыптастыратын маңызды пәннен сабақ беретін мұғалімдер өзара пікір алмасып, тәжірибемен бөлісуге, әдістемелік көмек алуға жағдай жасаған іс-шараның қажеттілігін атап өтіп, оны тұрақты өткізуге ұсыныс жасады. Баяндамашылар Атырау қаласы әкімінің орынбасары П.Хасановтың Алғыс хатымен марапатталып, қатысушылар арнайы сертификаттарға ие болды.
Жас тарихшылар слеті Атырау қалалық ішкі саяат бөлімі, Атырау университеті, «Жас өрен» үкіметтік емес ұйымы, өңірлік «Рухани жаңғыру» жобалық кеңсесінің ұйымдастыруымен өткізілгендігін атап өтеміз.
ПІКІРЛЕР