Ата аманаты
Кеңес Одағының батыры, жазушы Бауыржан Момышұлының келіні Зейнеп Ахметова апайымыз Халел Досмұхамедов атындағы Атырау мемлекеттік университетінің акт залында оқытушы-профессорлар мен қызметкерлері және студенттерімен кездесті.
Тал бесіктен басталатын қазақ халқының салт-дәстүрі мен әдет-ғұрпы туралы өскелең жас ұрпақтарға ұлықтап, ата аманатын көркем түрде жеткізіп келе жатқан Зейнеп апаймен кездесуді асыға күткендей, университет акт залында ине шаншар бос орын болмады.
Халық қаһарманы, даңқты қолбасшы, қазақтың көрнекті жазушысы Бауыржан Момышұлының келіні, даңқты атамыздың тұяғы, заманымыздың көрнекті жазушысы болған Бақытжан ағамыздың адал жары Зейнеп апай зерделі әңгімелері мен тәрбиеге толы естеліктерін тәуелсіз еліміздің жас ұрпақтарына әдемі жеткізе білді және залдан қойылған әр сұраққа жауап беріп отырды.
Әдемі кештің соңы университет ректоры атынан алғыс хаты табысталып, университет «Қыз Жібек» қыздар клубы атынан сыйлықтар табысталды. Атырау облысы әкімінің атынан Нұрсауле Сайлауқызы иығына шапан кигізіп, әкімшіліктің атынан ат мінгізді. Әсерлі кездесуде Зейнеп апайдың кітаптарын алып, апаймен фотоға түсу сәті әр қатысушыға ерекше көңіл күй сыйлағандай еді.
ПІКІРЛЕР