Ұстаздың мерейлі сәті
Өткен аптада университеттің Музыка және өнер кафедрасының доценті Тамара Мұқанқызы Сүйінғаринаның 60 жас мерейтойына және ғылыми-педагогикалық қызметінің 30 жылдығына арналған салтанатты кеш өтті.
1988 жылы Атырау мемлекеттік университетіне арнайы шақыртумен келген ұстаз «Сольфеджио», «Халық шығармашылығы», «Музыка тарихы», «Музыкалық білім беру әдістемесі» пәндерінен дәріс оқыды. Бірнеше рет «Музыка апталықтары» ұйымдастырылып «Музыка әлемі» айдармен тақырыптық лекциялары телебағдарламаларда берілді.
Ұстаздың жетекшілігімен дайындалған студенттер бірнеше республикалық сайыстарда жүлделі орындар алды.
Т.Сүйінгарина «Музыкалық білім» мамандығы студенттеріне арналған «Музыка мұғалімі қызметіне қойылатын талаптар» (2009 ж.), «Сыныптан тыс музыкалық тәрбие жұмыстары» (2014 ж.) оқу-әдістемелік құралдары және «Музыкалық білім білім берудің өзекті мәселелері» (2017 ж.) ғылыми мақалалар жинағы, инклюзивтік оқыту бағдарламасы бойынша «Әлем музыкасының тарихынан» (2018 ж.) аудио-дәрістер жинағының және І.Жансүгіров атындағы Жетісу мемлекеттік университетінің профессоры, п.ғ.д. Р.К.Дүйсенбінова мен Ақтөбе өңірлік мемлекеттік университетінің доценті, п.ғ.к Н.Е.Мукеевамен авторлық бірлестікте жазылған «Музыка пәнін оқыту әдістемесі» (2018 ж.) атты оқулығының авторы.
Атырау университетінің ғылым жөніндегі проректоры С.Идрисов ұстазды педагогикалық ұжым және университет ректоры атынан құттықтап, «Х.Досмұхамедов атындағы Атырау мемлекеттік университетінің дамуына қосқан үлес үшін» медалін тапсырды.
Мерейлі жасқа арналған салтанатты жиынға ұстаздың әріптестері, шәкірттері қатысып, Қазақстан Республикасының Еңбек сіңірген қызметкері Сәуле Жанпейісова, «Құрмет» ордені иегері, университет түлектері танымал әнші Қайрат Кәкімов, халықаралық және республикалық конкурстардың лауреаты Айбар Ғаниұлы қатысып, құттықтауларын жолдады. Сондай-ақ «Музыка және өнер» кафедрасы жанына құрылған студенттік оркестр, студенттік хор, домбырашы қыздар квинтеті өнер көрсетті.
Г.Кайргалиева
ПІКІРЛЕР