Жолдауға сай жүйелі жұмыс жасалуы тиіс
Қазақстан Республикасы Президентінің «Қазақстандықтардың әл-ауқатының өсуі: табыс пен тұрмыс сапасын арттыру» туралы 2018 жылдың 5 қазанындағы Қазақстан халқына Жолдауын насихаттау іс-шаралары жоспарына сай университеттің ғылым жөніндегі проректоры С.Н.Идрисов осы жылдың 25 қазанында Экономика және құқық факультетінің профессор-оқытушылар құрамымен кездесу өткізді.
Проректор С.Н.Идрисов «Елбасының 2019 жылды «Жастар жылы» деп жариялауы - біз үшін жақсы жаңалық және оның жастарға үлкен қуаныш сыйлағанын ерекше әсермен жеткізгім келеді. Бұл осы уақытқа дейін мемлекет тарапынан жастарға көрсетіліп келе жатқан қамқорлықты одан әрі дамытып, тұтастай ұрпақ ісін жан-жақты қолдау» деп атап өтіп, Жолдауда Мемлекет басшысы нарықта тек сапалы білім бере алатын жоғары оқу орындары қалу керектігін баса айтқанына және елдің ЖІӨ-нің 10 пайызын ғылым мен білімге бөлу мақсат етіп қойылғанына назар аударды.
«Шынымен де білікті маман дайындауда және ғылыми жаңалықтар, өнертапқыштықтар жүйесінде университеттер маңызды рөл атқарады. Осыған орай отандық ЖОО оқытушылардың қайта даярлықтан өтуіне басты назар аударып, әлемдік жетекші университеттердің сыннан өткен тәжірибесін пайдалануы тиіс деп ойлаймын. Бұл – қазақстандық жоғары білім беру жүйесін заман ағымына сәйкестендіруге негіз болады» дей отырып, Жолдау 2019 жоғары білім жүйесіне қатысты айтылғандарды оқытушылармен талқылап, сол межеге ұмтылуға үндеу тастады. Сондай-ақ ПОҚ ғылымға қатысты ізденістеріне жан-жақты қолдау жасалатынын, атап айтқанда докторантураға түсудегі шет тілін меңгеруге (IELTS 5,5 тапсыруға дайындық), ғылыми мақалалар жариялауға, монографиялар шығаруға көмек болатынын мәлімдеді.
Жолдаудағы әлеуметтік тұрғыда айтылған мәселелер де проректор және оқытушылардың кездесуінде кең қолдау тапты, атап айтқанда, ұстаздардың мәртебесін көтеру, Қазақстан халқының өмір сүру сапасы стандарттарын дамыған елдерге елдердікіне жақындату, табысын өсіру және еңбекақы төлеу жүйесін жетілдіру.
Проректор кездесу соңында Жолдауға қолдау білдірген факультеттің барша оқытушыларына жылдың басты құжатын талқылау, түсіндіру және іске асыру жұмыстарына белсенді қатысуға шақырды.
ПІКІРЛЕР