«Рухани жаңғыру» бағдарламасын іске асыру барысында өңірлік сарапшылар кеңесінің отырысы өтті
8 қыркүйек күні Х.Досмұхамедов атындағы Атырау мемлекеттік университетінде "Рухани жаңғыру" бағдарламасын іске асыру бойынша өңірлік Сарапшылар Кеңесінің отырысы өтті.
Отырысқа ҚР Қоғамдық даму министрлігінің Азаматтық қоғам істері комитетінің төрағасы Әлия Қайратқызы Галимова қатысты. Кеңесті өңірлік Сарапшылар кеңесінің төрағасы, Х.Досмұхамедов атындағы Атырау мемлекеттік университетінің ректоры, профессор А.А.Талтенов жүргізіп, алғашқы сөз кезегін өңірлік жобалық кеңсе жетекшісі О.Бимановаға жолдады. Жетекші өңірдегі жұмыстарға тоқталып, алдағы жоспарларымен бөлісті.
Сондай-ақ, Атырау облысы ішкі саясат басшысы Ж.Бисембиев сөз алып, жоспарланған жобалар мен іc-шаралардың идеялық мазмұны мен мақалаға сәйкестігіне назар аударып, пікірін білдірді, ал, «Атырау-Ақпарат» ЖШС директоры, филология ғылымдарының кандидаты Б.Әбдешов бағдарламаның жұмысын одан әрі күшейтіп, сапасын арттыруға ден қойып, кеңірек насихаттауда «бір жеңнен қол, бір жағадан бас шығарып» бірлесе жұмыс жасауға шақырды.
Жалпы, Кеңес мүшелері 2018 жылы «Рухани жаңғыру» бағдарламасы аясында облыста жүзеге асырылып жатырған жобаларға сараптамалық баға беру мақсатында ұсыныс-пікірлерін ортаға салып, талқылады.
Отырыс соңында, кеңес мүшелері арнайы келген Азаматтық қоғам істері комитетінің төрағасы Әлия Қайратқызына алғысын айтып, ел мүддесі жолындағы ортақ жұмыстарына сәттілік тіледі.
ПІКІРЛЕР