«Назарбаев моделі: стратегиялық болжам және прагматизм»
2018 жылдың 19 қыркүйегінде Х. Досмұхамедов атындағы Атырау мемлекеттік университетінің АКТ залында «Назарбаев моделі: стратегиялық болжам және прагматизм» халықаралық ғылыми-тәжірибелік конференциясы өтті.
Іс-шара Қазақстан Республикасының Тұңғыш Президенті – Елбасы кітапханасының «Н.Назарбаев: дәуір, тұлға, қоғам» кешенді көшпелі көрме жобасы аясында өткен болатын.
Конференцияның мақсаты Қазақстан Республикасының Тұңғыш Президенті – Елбасының Қазақстан жолы немесе Назарбаев моделі ретінде белгілі мемлекеттік басқару стратегиясын, оның қоғамның тұрақты дамуындағы, еліміздің тұтастай экономикалық және әлеуметтік-саяси жаңғыруындағы, Қазақстан Республикасындағы мемлекеттік басқару жүйесін реформалаудағы рөлін талқылау болып табылады.
«Н. Назарбаев: дәуір, тұлға, қоғам» көшпелі ғылыми-білім беру және мәдени-ағартушылық көрме жобасы аясында халықаралық конференциясында Әмірхан Рахымжанов модераторлық етіп, осы конференцияны ұйымдастыруға мол үлесін қосқан Атырау облысының әкімі Н.Ноғаев пен Университет ректоры А.Талтеновке ҚР Тұңғыш Президенті Елбасы кітапханасының атынан алғысын білдіріп, алғы сөз облыс әкімі Н.Ноғаевке берілді.
Атырау облысы әкімі Нұрлан Ноғаев қатысушыларды конференцияның ашылуымен құттықтады.
Осыдан кейін, сөз алған «Назарбаев моделі» конференциясын Қазақстан Республикасының Тұңғыш Президенті – Елбасы кітапханасы директорының орынбасары, саяси ғылымдарының докторы, профессор Әмірхан Рахымжанов:
– Әлемнің саяси картасында ежелгі қазақ даласының аумағында тәуелсіз мемлекет – Қазақстан Республикасының құрылғанына 26 жыл толды. Бұл Қазақстанның қалыптасуында егемен мемлекет ретінде қоғам өмірінің қарқынды, сапалы әрі терең жаңарған дәуірі ретінде тарихқа енді. Демек, сіздер Қазақстанның экономикалық жетістіктері қандай жолмен келгенін білесіздер. Әлемдік қауымдастықтан жас мемлекетіміздің өз орнын табуы бүкіл қазақстандықтардың қажырлы да ерен еңбегінің арқасында келгенін жақсы түсінеміз. Елбасының тура басшылығымен республикамыз әлемге бірізді кешенді экономикалық реформаның жарқын үлгісін ұсынды, оның негізінде құрылымдылық саяси жаңғыру жүйелі түрде жүргізілді. Әлемнің жетекші мемлекеттерінің басшылары Қазақстанның даму тәжірибесін үздік деп таныды. Мемлекет басшысының жаһандық сипаттағы бастамаларды ұсыну қабілеті, батыл да жемісті реформалық идеялары әлемді мойындатты. Елбасымыз елімізді нақты уақыттың талабына сай өзгертіп, гүлдендірді. Оның саяси сенімінің әдісі – қиындықтарға төтеп беріп, күрделі сәттерде табанды іздену, ең бастысы – алға жылжуға күш салу, – екенін конференция модераторы атап айтып, – Елбасы қызметі мен тұлғасының сан қырлылығын сараптап алмай, басқару моделін талқылау мүмкін емес, – деп сөзін жалғады.
Ресей, Түркия, Иран, Өзбекстан елдерінің ғалымдары, аналитиктері мен сарапшылары, сондай-ақ отандық және шетелдік жоғары оқу орындарының оқытушылары мен студенттері қатысқан конференцияда қоғамды трансформациялау және жаңа Қазақстанды қалыптастыру стратегиясын жүзеге асыру, Қазақстан Республикасының Тұңғыш Президенті – Елбасы Н. Ә. Назарбаев тұлғасының Қазақстанның егемендігі мен мемлекеттілігін нығайтудағы рөлі, Тұңғыш Президент – Елбасының сыртқы саяси бастамалары Қазақстанның әлемдік қауымдастықтағы халықаралық мәртебесі мен беделін арттырудың факторы ретінде, жаңа жаһандық ақиқаттағы жаңғырудың қазақстандық үлгісі тақырыптары бойынша ғылыми зерттеулердің қорытындылары ұсынылды.
ПІКІРЛЕР