Ғарифолла Есім «Тіл тәуелсіздігі» мәселесін көтерді
2018 жылдың 14 қыркүйегінде Х.Досмұхамедов атындағы Атырау мемлекеттік университетінде ҚР мәдениет және спорт министрлігінің кеңесшісі, белгілі қоғам қайраткері, ҚР Ғылым академиясының академигі Ғарифолла Есіммен кездесу болып өтті.
Кездесуді университеттің ғылыми жұмыстар жөніндегі проректоры С.Н.Идрисов кіріспе сөзбен ашты. Ол өз сөзінде С.Н.Идрисов Ғарифолла Есімнің ғылыми еңбектіріне, қоғамдық қызметіне жан-жақты тоқтала келіп, бүгінгі кездесудің басты мақсаты – ҚР Білім және Ғылым министрлігі, А.Байтұрсынов атындағы Тілдер институты мен Ш.Шаяхметов атындағы «Тіл – Қазына ұлттық ғылыми – практикалық орталық» бекіткен «Қазақ емлесінің негізгі ережелерін» талқылауға арналатындығын атап өтті.
Академик Ғарифолла Есім өз сөзінде Тәуелсіздік, Астана және Қазақ тілі еліміздің үш тұғыры екенін айта келіп, «Тіл тәуелсіздігі» мәселесін көтерді. Академик «тілдің тәуелсіздігі ТӘУЕЛСІЗДІК ұғымын кеңейте түседі» деп атап өтті.
Аталмыш мәселеге байланысты Ғ.Есім университет ұжымы мен студенттер қауымын «Қазақ емлесінің негізгі ережелерімен» таныстырды.
Ғарифолла Есім бұл «жоба» негізінде бекігендігін, дегенмен де, алдағы уақытта әр аймақтардағы тіл мамандары мен зиялы қауымның пікірлерін сараптау мақсаты көзделетіндігіне тоқталды.
Кездесу барысында «жобаға» байланысты өз ойларын ф.ғ.д. профессор Ж. Қадір, фил.ғ.к., доцент Ж.Абдрахманова, фил.ғ.к., Г.Сабирова т.б. білдірді.
Кездесу соңында университет проректоры С.Н.Идрисов қорытынды сөз сөйлеп, Қазақстандағы латын графикасына көшуге байланысты Елбасының ұстанып отырған саясатын Атырау мемлекеттік университеті ұжымының толық қолдайтындығын атап өтті.
ПІКІРЛЕР