Университет курсанттары әскери ант қабылдады
Бүгін Х.Досмұхамедов атындағы Атырау мемлекеттік университеті әскери кафедрасының тұңғыш курсанттары Отанға, елге және Президентке адал қызмет ететіндері туралы әскери ант қабылдады.
Әскери кафедра оқуының толық курсынан өткен алғашқы 95 курсант «Мен өз Отанымның, тәуелсіз Қазақстанның мемлекеттік мүдделерінің ержүрек әрі батыл қорғаушысы болуға ант етемін!» деп ант берді.
Салтанатты шара Жеңіс саябағында студенттердің ата-аналары және оқу орнының профессор-оқытушылар құрамының қатысуымен болды.
Алғашқы құттықтау сөз университеттің ғылыми істер жөніндегі проректоры Саламат Идрисовке беріліп: «Құрметті түлектер, сіздерді әскери ант қабылдау мерекелеріңізбен құттықтаймын. Сіздер біздің университет тарихындағы алғашқы курсант түлектерсіздер. Қабылдаған анттарыңызға берік болып, болашақта адал қызмет етуге тілектеспін» - деді.
Шара барысында Атырау облысы бойынша Қорғаныс істері жөніндегі Департамент бастығының орынбасары полковник Балтаев Андрей Анатольевич, Ұлттық ұлан 5546 әскери бөлім командирінің тәрбие және әлеуметтік-құқық жұмыстары жөніндегі орынбасары майор Мұратаев Қазбек, Тәжік-Ауған соғысы ардагерлері қоғамының Атырау облысы бойынша филиалы төрағасы Қадырқұлов Қанат, студент анасы Исмағұлова Ақмарал және ант қабылдаған студенттер тарапынын Е.Зинеденов, Ә.Силықова құттықтау сөздерін сөйледі.
«Қадірменді салтанатты жиынға қатысушылар! Біз Х.Досмұхамедов атындағы Атырау мемлекеттік университеті әскери кафедрасының курсанттары өз Отанымызға адал қызмет үшін ант еттік. Өйткені біз болашақ жас ұрпақты тәрбиелетін курсанттармыз. Осындай асыл қасиеттерімізді бойға дарытып, барлығын үйреткен офицер ұстаздарымызға алғысымыз шексіз. Қазақстаның болашығы біздер, сондықтан боашағымызды жарқын етуге ант етеміз» - дейді курсант Еркебұлан Зинеденов.
Әскери қызметтің қыр-сырына қаныққан кафедра түлектері сапта жүру тәртібін көрсетті.
Мерекелік шара соңы ҚР Ұлттық ұлан 5546 әскери бөлімі оркестрінің орындауында концертпен жалғасын тапты.
Алтынай СӘЛІМГЕРЕЙҚЫЗЫ,
Суретті түсірген: Құдияр ДАНИЯРОВ
ПІКІРЛЕР