Жаһандану жағдайындағы мемлекеттік тілдің дамуы
Жаһандану жағдайындағы мемлекеттік тілдің дамуы
Бүгін 5 маусымда Атырау облысының әкімдігі және Х.Досмұхамедов атындағы Атырау мемлекеттік университеті бірлесе ұйымдастырып отырған «Қазақ жазуын латын әліпбиіне көшіру: жаһандану жағдайындағы мемлекеттік тілдің дамуы» атты халықаралық ғылыми-тәжірибелік конференция өз бастауын алды. Жиынға лингвистика саласындағы ғалымдар мен зерттеушілер шақырылды.
Ғылыми-техникалық прогресстің және заманауи медиа-коммуникацияның дамуына байланысты латын графикасы барған сайын кеңінен таралып, қазіргі заманғы жаһандық медиа кеңістіктің, ғылым, технология мен экономика әлемінің инновациялық әліпбиі болып саналады.
Латын әліпбиі әлемдегі ең көне алфавиттердің бірі ретінде қазіргі уақытта Еуропа, Америка, Азия мен Африка мемлекеттерінде пайдаланылады, ал басқаларында ғаламтор тілі ретінде қолданылады. Мемлекет басшысы Н.Ә.Назарбаев Қазақстан өзіндік сәйкестігі және мәдениетін сақтау арқылы жаңа технологиялар мен білімдерді қабылдай отырып, әлемдегі бәсекеге қабілетті 30 елдің қатарына енуді мақсат етіп қойды. Әрине, бұл тұрғыдан қазақ әліпбиін латындандыру жаңа білімді қабылдау мен меңгеруді айтарлықтай жеңілдететіні сөзсіз. Мемлекеттік тілдің дамуында қазақ әліпбиін кириллицадан латын графикасына аударудың рөлі лингвистикалық, ақпараттық, әлеуметтік, мәдени, философиялық және тарихи зерттеулерді қажет ететін құбылыс болып табылады. Осы мәселе аясында жаһандану жағдайында ұлттық тілдің сақталуы, одан әрі дамуы және жаһандық коммуникациялық кеңістіктегі орны туралы мәселені қарастыру қажет.
Екікүндік конференцияның негізгі мақсаттарының бірі – теориялық мәселелермен қатар, Қазақстанның мемлекеттік тілін латын графикасына біртіндеп көшірудің әдістемелік, практикалық, нормативтік-құқықтық, ақпараттық зерттеу.
Атырау мемлекеттік университетінің ғылыми істер жөніндегі проректоры Саламат Идрисов конференция қатысушыларына «қош келдіңіздер» айтып, екі күнге созылатын ғылыми конференцияның өткізілу барысымен таныстырды.
Конференция «Латын әліпбиіне көшу – заман талабы» тақырыбындағы ғылыми-әдістемелік семинармен бастау алды. Семинарды Атырау облысы Білім беру басқармасының басшысы Қайырғали Кенжегалиев жүргізді. Мемлекеттік қызметкерлер, колледж бен мектеп мұғалімдері, тіл мамандары және конференция қонақтарының қатысуымен өткен семинарда бірқатар ғалымдар өз баяндамаларын таныстырып, бірнеше ұсыныстарымен бөлісті.
Айта кетейік, конференция ертең "Жаһандану кезеңіндегі әлемдік коммуникациядағы латын графикасының рөлі", "Қазақ жазуын латын әліпбиіне көшіру: әлемдік тәжірибе және ғылыми-әдіснамалық ұстанымдар", "Рухани жаңғыру: Ұлттық білім жүйесіндегі инновациялық әдістеме" атты 3 секция аясында жалғасын табады.
ПІКІРЛЕР