Айбынды асқақтатқан Ұлы Жеңіс!

Айбынды асқақтатқан Ұлы Жеңіс!

Биыл, 9 мамыр – Ұлы Жеңіс күніне 73 жыл толуда! Ұлы Жеңіс ардагерлеріне құрмет көрсету, жастарды Отансүйгіштікке, ерлікке баулу мақсатында университетіміздің әскери кафедра ұжымы кеш ұйымдастырды.

«Еңсесі биік – Ұлы Жеңіс» атты шарада Қазақстан Қарулы күштеріне 26 жыл толуын да атап өтті. Салтанатты шарада әскери кафедра бастығы полковник Қуандық Бердыгалиев пен «Батыс» өңірлік Қолбасшылығының ұйымдастыру-жұмылдыру басқармасының бастығы полковник Рашид Наурызбеков құттықтау тілектерін айтып, сөз сөйледі.

Концерттік бағдарламада әскери кафедраның талантты студенттері мен «Батыс» өңірлік Қолбасшылығының көркемөнерпаздары концерттік бағдарламалар қойды. Сонымен қатар, шарада соғыс алдындағы өмір мен «Майданнан хат» көріністерін сахналандырды. Арнайы кеште деректі фильм мен «Ұлы Жеңіске – Ұлы үлес» атты Қазақстан батырлары туралы дыбысты бейнебаян да көрсетілді. Сахнада Ұлы Отан соғысы және Еңбек ардагерлерінің «Фронтовичка» халықтық хоры ән салды.

Концерт соңында Х.Досмұхамедов атындағы Атырау мемлекеттік университеті әлеуметтік мәселелер және жастар саясаты жөніндегі проректор Ләйля Қойшығұлова құттықтау сөз сөйлеп, ардагерлерге «Алғыс хат» табыс етті. Осынау мерекемен әскери кафедраның 2 курс студенті Еркебұлан Зинеденов кафедра оқытушыларына арнау өлеңін оқып, кафедра меңгерушісі Қуандық Бердыгалиев пен запастағы майор Гүлнара Бердалиеваға құттықтау хатын ұсынды.

Біздің тәуелсіздігіміз бен тұтастығымызды, тыныштығымыз бен бейбіт тірлігімізді қас қақпай күзетіп тұрған, халқымызға қорған болған ұлттық әскеріміздің айбыны арта берсін!

 

 

Малика ТАКЕЖАНОВА,

журналистика мамандығының 2 курс студенті

ПІКІРЛЕР

Тізімге қайта оралу

Құттықтаймыз!

17 Май 2022 37