Ардагер ұстаз тұрған үйде ескерткіш тақта ашылды
3 мамырда Х.Досмұхамедов атындағы Атырау мемлекеттік университетінің дамуына зор үлес қосқан ұстаз, Ұлы Отан соғысының қатысушысы, «Халық ағарту ісінің үздігі» белгісінің иегері Баяндиев Дәріжан Шадыманұлының тұрған үйіне ескерткіш тақта тас орнатуға арналған салтанатты жиыны өтті.
Өңірімізге танымал тұлғаға арналған ескерткіш тақта Атырау қаласының орталығы болып табылатын академик Қ.Сәтбаев көшесіндегі 32-үйде орнатылды. Салтанатты жиынға Атырау университетінің проекторы Саламат Идрисов, ғалым-хатшы Баянсұлу Тыныбаева, оқу орнының ұстаздары мен студенттері, ұстаздың шәкірттері мен жақын туыстары, қаламыздың танымал адамдары қатысты.
Университет кәсіподақ ұйымының төрағасы Қылышбай Сүндетұлы Дәріжан Баяндиевтің өмір жолымен таныстырды. Атырау облысы, Қызылқоға ауданында 1920 жылы дүниеге келген Дәріжан ағай 1936-1937 жылдарыГурьев мұнай техникумында, кейін Орал педагогикалық институтын білім алды. Байшонас орта мектебінің мұғалімі ретінде 1940-1942 жылдар аралығында еңбек етті. 1942-1944 жылдары Ұлы Отан соғысына қатысты. 1949 жылы Орал педагогикалық институтын тәмамдады. 1949-1950 жылдары Гурьев облыстық ішкі істер басқармасында аға ғылыми қызметкері болып қызмет атқарды. Гурьев мұғалімдер институтының оқытушысы, Гурьев пединститутының аға оқытушысы, 1963-1967 жылдар аралығында кафедра меңгерушісі қызметтерін атқарды.
«Халық ағарту ісінің үздігі» белгісімен, «За победу над Германией в Великой Отечественной войне 1941-1945 годы» және басқа да медальдармен, облыстық партия, кәсіподақ комитеті мақтау грамоталарымен марапатталған.
Жиында Атырау қалалық ардагерлер ұйымының төрағасы Әйіпқали Бекеш, Атырау университетінің ардагері профессор Жиенбай Бақи әріптес, замандас ретіндегі пікірлерін ортаға салса, Баяндиевтің шәкірттері педагогика ғылымдарының кандидаты, университет ардагерлер кеңесінің төрағасы Шахман Нағимов, тарих ғылымдарының докторы Аққали Ахмет ұстаздың ерекше қасиеттері жайындағы естеіктерімен бөлісті.
Салтанатты шараға қатысушылар жас ұрпақты тәрбиелеу ісінде өзінің адами қасиеттерімен, өнегелі өмір жолымен ұлағат қалдырған тұлғаны дәріптеудің «Рухани жаңғыру» бағдарламасымен астасқан маңыздылығын атап өтіп, еңбек адамына жасалған құрмет үшін ризашылықтарын білдірді.
ПІКІРЛЕР